हाय रिस्क प्रेग्नन्सीच्या प्रमाणात वाढ

पुणे : करिअरमुळे बऱ्याच महिला गर्भधारणेची प्रक्रिया पुढे ढकलतात. जसजसे वय वाढते, तसतसे गर्भवती महिलेला मधुमेह आणि उच्च रक्तदाब, बाळाला डाउन्स सिंड्रोम होण्याचा धोका वाढतो. प्रजननाच्या वयात गर्भधारणा न झाल्यास ‘हाय रिस्क प्रेग्नन्सी’चे प्रमाण वाढते. गेल्या वर्षभरात विविध कारणांमुळे हाय रिस्क गर्भधारणेच्या प्रकरणांमध्ये ६५ टक्क्यांनी वाढ झाली आहे, असे वैद्यकतज्ञांचे मत आहे.

मधुमेह, उच्च रक्तदाब, एकाधिक गर्भधारणा, पीसीओएस, अशक्तपणा, हृदयरोग, लठ्ठपणा, दमा किंवा इतर कोणत्याही दीर्घकालीन आजारांसारखी आरोग्य समस्या असलेल्या मातांना गर्भधारणेदरम्यान धोका उद्भवू शकतो. ज्या मातांना स्वाइन फ्लू, डेंग्यू ताप, कावीळ किंवा मूत्रमार्गाच्या संसर्गाची लागण किंवा गर्भावस्थेतील गुंतागुंत झाल्याने तत्काळ रुग्णालयात दाखल करावे लागते. अशा माता व जन्मलेल्या बाळाला याचा धोका असू शकतो. म्हणून सावधगिरी बाळगून वेळीच योग्य उपचार मिळवणे गरजेचे आहे, असे मत स्त्रीरोगतज्ज्ञ डॉ. गिरिजा वाघ यांनी व्यक्त केले.

स्त्रीरोगतज्ज्ञ डॉ. राजेश्वरी पवार म्हणाल्या, ''अलीकडच्या वर्षांत रुग्णालये आणि प्रसूतिशास्त्रज्ञांच्या असे लक्षात आले, की गर्भवती महिलांना मधुमेह किंवा जुळी गर्भधारणा झाल्याच्या घटना वारंवार घडत आहेत. या गरोदरपणात विशेष काळजी घेणे आवश्यक असते. बऱ्याच गर्भवती मातांना पीआयएच (गर्भधारणेदरम्यान-उच्च रक्तदाब) किंवा प्री-एक्लेम्पसिया नावाची स्थिती देखील माहीत नसते. प्री-एक्लेम्पसियामध्ये रक्तदाब वाढतो आणि गर्भवती महिलेच्या पायांवर सूज येते. त्यावर वेळीच उपचार न केल्यास गुंतागुंत निर्माण होऊ शकते. आई आणि बाळासाठी ही स्थिती धोकादायक ठरु शकते.''

चौकट

“कुठल्याही वयात महिलांमध्ये अकाली अंडाशयाची गुणवत्ता कमी होणे (पीओए) ही समस्या उद्भवू शकते. परंतु, याबाबत महिलांमध्ये जागरूकतेचा अभाव असल्याने याकडे बऱ्याचदा दुर्लक्ष केले जाते. वाढत्या वयानुसार अंडाशयाची संख्या व गुणवत्ता कमी होत जाते. अशा वेळेस महिलेला गर्भधारणा करण्यास अडचणी येतात. म्हणूनच ज्या महिला वयाच्या चाळिशीनंतर आई होणं पसंत करतात, त्या महिलांना अनेक समस्यांना सामोरे जावे लागते. त्यामुळे वयाच्या ३५ व्या वर्षाआधी गर्भधारणा होणे उत्तम ठरू शकते.”

- डॉ. मनाली पाटील, स्त्रीरोगतज्ज्ञ