जेजुरी पालिकेच्या सोलर पॅनलचे उदघाटन

जेजुरी : जेजुरी नगरपालिकेच्या प्रशासकीय इमारतीचा विजेचा प्रश्न कायमस्वरूपी मिटवण्यासाठी पालिकेने बसवलेल्या सोलर पॅनलचे उद्घाटन पुरंदर हवेलीचे आ. संजय जगताप यांच्या हस्ते आज करण्यात आले. जेजुरी पालिकेने संजय जगताप यांच्या प्रयत्नातून सर्वसाधारण जिल्हा वार्षिक योजनेअंतर्गत महाराष्ट्र ऊर्जा विकास योजनेच्या माध्यमातून सुमारे दहा लक्ष रुपये खर्चून पालिका इमारतीवर वीस किलो वॅट क्षमतेचा ऑन ग्रीड सौर प्रकल्प राबवला आहे. या प्रकल्पाचे उद्घाटन करताना जगताप यांनी या प्रकल्पामुळे जेजुरी पालिकेच्या दैनंदिन विजेचा प्रश्न कायमस्वरूपी मिटणार असून पालिकेची दरमहा ३० ते ३५ हजार रुपयांची बचत होणार असल्याचे सांगितले. चार वर्षांपूर्वी पालिकेत सत्ता आल्यानंतर पालिका वीज महामंडळाची सुमारे साडेतीन कोटींची थकबाकी नफा, फंड व इतर फंडातून भरली होती. यामुळे विकासकामे करण्यास अनेक अडचणी निर्माण झाल्या होत्या. मात्र त्यावर मात करीत पालिकेने शहरात मोठ्या प्रमाणावर विकासकामे केली आहेत. पालिकेचा नित्याचा खर्च म्हणजे वीजबिल असल्याने पालिकेने स्वतःची वीजनिर्मिती करून खर्च भागवण्याचा निर्णय घेऊन हा सौर प्रकल्प राबवला आहे. २६४ सोलर स्ट्रीट लाईटचे खांब बसवण्यात आले आहेत. यामुळे पालिकेचा दरमहा विजेवर होणारा साधारणपणे ३ लाख रुपयांचा खर्च वाचणार आहे. पालिकेचे हे एक आत्मनिर्भरतेकडे जाणारे पहिले पाऊल असल्याचेही जगताप यांनी म्हटले आहे. या सौर प्रकल्पाची संपूर्ण माहिती नगराध्यक्षा वीणा सोनवणे यांनी या वेळी दिली. या सौर प्रकल्पातून दररोज ८० युनिट याप्रमाणे महिन्याला २४०० युनिट वीजनिर्मिती होणार आहे. वर्षाकाठी २८५०० युनिटची वीजनिर्मिती होऊ शकणार आहे

या वेळी उपनगराध्यक्ष गणेश निकुडे, मुख्याधिकारी पूनम कदम, गटनेते सचिन सोनवणे, नगरसेवक बाळासाहेब दरेकर, बाळासाहेब सातभाई, अजिंक्य देशमुख, गणेश शिंदे, नगरसेविका रुक्मिणी जगताप, पौर्णिमा राऊत, शीतल बयास, वृषाली कुंभार, माजी नगरसेवक रमेश बयास, हेमंत सोनवणे आदी मान्यवर उपस्थित होते.

सौर प्रकल्प उद्घाटन करताना आ. संजय जगताप व इतर.