राजगुरूनगर : पुणे - नाशिक महामार्गावर चांडोली टोलनाक्याजवळ वेगवेगळ्या ठिकाणी दोन महिलांचे दुचाकीस्वाराने गळ्यातील सोन्याचे दागिने हिसकावून नेल्याची घटना (दि २४ )रोजी सांयकाळी सव्वासात वाजण्याच्या सुमारास घडली. महिला पायी घरी जात असताना दुचाकीवर आलेल्या दोन चोरट्यांनी दोन्ही महिलेच्या गळ्यातील सोन्याचे सुमारे १ लाख ८० हजार रूपायांचे दागिने हिसकावून पोबारा केला आहे. या घटनेने राजगुरूनगर परिसरात खळखळ उडाली आहे.
याबाबत सुरेखा संतोष जाधव ( रा. कडूस रोड चांडोली फाटा ता खेड ) या महिलेने खेडपोलिस ठाण्यात अज्ञात चोरट्यांविरुद्ध फिर्याद दिली आहे. पुणे -नाशिक महामार्गावर चांडोली गावचे हद्दीत चांडोली फाटा ते टोलनाक्याच्या पुढे नील हॉटेल दरम्यान हि घटना घडली. सुरेखा संतोष जाधव व सुनिता पांडुरंग रोकडे (रा विकास नगर देहू रोड ) या महिला रस्त्याने पायी जात होत्या. साधारण २० ते २५ वयोगटातील दोन अज्ञात चोरट्यांनी मोटरसायकलवरून येऊन सुरेखा जाधव यांच्या गळ्यातील ३० हजार रुपये किमतीचे सोन्याचे मनी गंठण आणि काही अंतरावर सुनिता रोकडे यांचे गळ्यातील दिड लाख रुपये किमतीचे तीन तोळे वजनाचे सोन्याचे मंगळसूत्र असे १ लाख ८० हजारांचे किंमतीचे दागिने चोरट्यांनी जबरदस्तीने ओरबडून नेले. या घटनेचा पुढील तपास पोलीस उपनिरिक्षक भारत भोसले करित आहे.