आळेफाटा (पुणे) : जुन्नर तालुक्यात बिबट्याचे दर्शन नित्याचं झालं आहे. बिबट्या पाळीव प्राण्यांसह मानवावर हल्ला हि नित्याचाच. मात्र आळेफाटा येथील सिद्धिविनायक सोसायटीमध्ये बिबट्या सावजाच्या शोधात शिरल्याचा व्हिडीओ सोशल मीडियात व्हायरल होत आहे. सोसायटीत लावण्यात आलेल्या सीसीटीव्ही कॅमेऱ्यात बिबट्याचा वावर दिसून येत आहे.
याबाबत समजलेली माहिती अशी की, आळेफाटा परिसरातील सिद्धिविनायक सोसायटीला कंपाउंड नसल्याने रात्रीच्या वेळी मोकाट कुत्री त्या ठिकाणी बसतात. सोमवारी (दि.२८) मध्यरात्री दोनच्या सुमारास सावजाच्या शोधात बिबट्या थेट सोसायटीच्या पार्किंगमध्ये शिरला. बिबट्याला पाहून कुत्री जिन्यांवरून टेरेसवर पळाली. बिबट्याही त्यांच्या पाठीमागे जिन्यांच्या पाहिऱ्या वर चढत गेला परंतु बिबट्याला टेरेस न सापडल्याने बिबट्या पुन्हा खाली आला.
बिबट्या सोसायटीमध्ये आल्यावर कुत्र्यांनी एकच कलगा केला परंतु ही घटना मध्यरात्री घडल्यामुळे कोणालाही जाग आली नाही. सोसायटीच्या सीसीटीव्ही कॅमेरामध्ये बिबट्या सोसायटीत येऊन गेल्याच्या उलगडा झाला. सोसायटीत बिबट्या दिसून आल्याने नागरिकांमध्ये भीतीचे वातावरण निर्माण झाले आहे. सोसायटीत बिबट्या अगदी सहजरित्या शिरला. मात्र, या वृत्ताने परिसरात एकच खळबळ उडाली आहे.
आळेफाटा परिसरात रहिवासी सोसायट्यांमध्ये यापूर्वीही अशाच प्रकारे बिबट्याचा वावर पहायला मिळाला आहे. बिबट्याचा सोसायटीत वावर असल्याचा व्हिडीओ जोरदार व्हायरल होत आहे.