जेजुरी (पुणे): तीर्थक्षेत्र जेजुरीत आज सोमवती अमावस्या यात्रेनिमित्त प्रचंड गर्दी झाली होती. सुमारे तीन लाखांवर भाविकांनी आज कुलदैवत खंडेरायाच्या देवदर्शन घेतले. आज सकाळी ११ वाजता देवाच्या मानकऱ्यांनी इशारात केल्यानंतर देवाचे खांदेकरी, मानकऱ्यांनी सदानंदाचा येळकोट, येळकोट येळकोट जयमल्हारच्या जयघोषात उत्सवमूर्तींची पालखी क-हा स्नानासाठी उचलली.
यावेळी बंदुकीच्या फैरी झाडून पालखी सोहळ्याला सलामी देण्यात आली. गडकोटातील मुख्य मंदिराला प्रदक्षिणा घालून सोहळ्याने क-हा नदीकडे प्रस्थान ठेवले. सायंकाळी ४ वाजता कऱ्हा नदीवर उत्सवमूर्तींना स्नान घालण्यात येणार आहे.
सोमवती अमावस्या असल्याने संपूर्ण दिवसभर राज्यभरातून आलेले भाविक गडावर जाऊन कुलदैवताचे दर्शन घेत होते. सदानंदाचा जयघोष आणि भंडार खोबऱ्याच्या उधळणीने संपूर्ण गडकोट आणि जेजुरीतील मुख्य रस्त्यावरून पिवळा धमक भंडाऱ्यात न्हाऊन निघाले होते. यामुळे सोन्याच्या जेजुरीचा प्रत्यय येत होता. भाविकांची दर्शन सोय, चोख बंदोबस्त ठेवण्यात आला होता.