वादळी पावसाने झोडपले

पिंपरी-चिंचवड शहरात विजेच्या कडकडाटासह मंगळवारी जोरदार पावसाने हजेरी लावली. अचानक आलेल्या पावसामुळे शहरवासीयांची चांगलीच तारांबळ उडाली.

पिंपरी : पिंपरी-चिंचवड शहरात विजेच्या कडकडाटासह मंगळवारी जोरदार पावसाने हजेरी लावली. अचानक आलेल्या पावसामुळे शहरवासीयांची चांगलीच तारांबळ उडाली. बिजलीनगरसह काही ठिकाणी झाडे पडली तर डुडुळगाव, चºहोली परिसरात घरावरील पत्रे उडून गेले. मंगळवारी सकाळपासूनच वातावणात उकाडा जाणवत होता. दुपारी एकच्या सुमारास ढग भरले होते. सव्वा एकच्या सुमारास पावसाला सुरुवात झाली. काही वेळातच पावसाने जोर धरला. विजेचा कडकडाट आणि वार्‍यासह कोसळलेल्या पावसामुळे जनजीवन विस्कळीत झाले. सुट्टीचे दिवस असल्याने अनेकजण कुटुंबासह फिरण्यासाठी घराबाहेर पडले होते. मात्र अचानक आलेल्या पावसामुळे घराबाहेर पडलेल्यांची चांगलीच फजिती झाली. पावसापासून संरक्षण करण्यासाठी कोणतेही साहित्य सोबत नसल्याने भिजण्याशिवाय पर्याय नव्हता. वाहनांमध्ये पाणी गेल्याने अनेक ठिकाणी वाहने बंद पडण्याच्या घटना घडल्या. उकाडा जाणवत असतानाच अचानक आलेल्या पावसात अनेकांंनी भिजण्याचा आनंदही लुटला. रस्त्यावर ठिकठिकाणी पाणी साठले होते. डांबरी रस्त्यावर पाण्याचा निचरा होत नसल्याने काही ठिकाणी मोठी डबकी साठली होती. बिजलीनगर चौकात पावसामुळे एका मोटारीवर झाड कोसळले. यामध्ये मोटारीचे नुकसान झाले. सुमारे पाऊणतास सुरू असलेल्या पावसामुळे शहरवासीयांची चांगलीच त्रेधातिरपिट उडाली. दुपारनंतर ढगाळ वातावरण होते. मोशी : दिवसभर उकाड्याने हैराण झालेल्या नागरिकांना दुपारनंतर पडलेल्या मुसळधार पावसाने थोडासा दिलासा दिल्याचे चित्र दिसून आले. सूर्य मोठ्या प्रमाणावर आग ओकत होता. त्यामुळे दुपारच्या वेळी नागरिकांना कडाक्याच्या उन्हामुळे हैराण झाले होते. मंगळवार दुपारी अचानक सुरू झालेल्या पावसामुळे मोशी, डुडुळगाव परिसरातील रहिवाशी सुखावले. (वार्ताहर)