फेट्यांनी घातली पालिकेला ‘टोपी’

निमंत्रित मान्यवरांना पालिकेकडून भाडे कराराने घेऊन बांधण्यात आलेले फेटे सुमारे ९0 निमंत्रितांनी परत न केल्याने या फेट्यांचे सुमारे ४९ हजार ५00 रुपये मोजण्याची वेळ पालिका प्रशासनावर आली आहे.

पुणे : तब्बल तीन कोटी रुपये खर्चून महापालिका भवनातील नूतनीकरण करण्यात आलेल्या छत्रपती शिवाजी महाराज सभागृहाच्या उद्घाटनासाठी बोलाविण्यात आलेल्या मान्यवरांच्या कृपेने महापालिकेस ५0 हजार रुपयांचा भुर्दंड पडला आहे. या कार्यक्रमासाठी आलेल्या निमंत्रित मान्यवरांना पालिकेकडून भाडे कराराने घेऊन बांधण्यात आलेले फेटे सुमारे ९0 निमंत्रितांनी परत न केल्याने या फेट्यांचे सुमारे ४९ हजार ५00 रुपये मोजण्याची वेळ पालिका प्रशासनावर आली आहे. विशेष म्हणजे या अनपेक्षित खर्चास नुकतीच स्थायी समितीनेही कोणताही गाजावाजा न करता मान्यताही दिली आहे.
अत्याधुनिक तंत्रज्ञानाचा वापर करून पालिकेने नूतनीकरण केलेल्या या सभागृहाचे उद्घाटन आणि शारदाबाई पवार शिष्यवृत्ती वाटप कार्यक्रमाचे आयोजन १७ जानेवारी २0१४ रोजी देशाचे माजी कृषिमंत्री शरद पवार यांच्या हस्ते करण्यात आले. या उद्घाटन सोहळ्यासाठी उपस्थित राहणाऱ्या शहराचे खासदार, आमदार, तसेच महापालिकेतील आजी-माजी नगरसेवक, नगरसेविका यांना फेटे बांधण्याची व्यवस्था करण्याचे आदेश महापौरांनी दिले होते. त्यानुसार सुमारे २00 मान्यवरांना फेटे बांधण्याचे काम एका ठेकेदारास देण्यात आले होते. हे फेटे एका दिवसासाठी फेटा बांधणीसह २५0 रुपये या दराप्रमाणे भाडेतत्त्वावर घेण्यात आले होते. मात्र, कार्यक्रम संपल्यानंतर सुमारे ११0 मान्यवरांनी हे फेटे परत केले, पण ९0 मान्यवर हे फेटे चक्क घरीच घेऊन गेले. यामुळे या फेट्यांच्या भरपाईपोटी प्रतिनग ५५0 रुपये (फेट्याच्या बांधणीसह) ठेकेदारास द्यावे लागणार आहेत. ही रक्कम सुमारे ४९ हजार रुपये ५00 रुपये आहे. त्याचा भुर्दंड विनाकारण महापालिकेस सहन करावा लागणार आहे. ही रक्कम संबंधित ठेकेदारास देण्यास स्थायी समितीने नुकतीच मान्यता दिली असून, या कार्यक्रमासाठीचे फेट्यांचे बिल ८९ हजार २५0 रुपये आहे. (प्रतिनिधी)