जिल्हा परिषद पंचायत समितीच्या तयारीला लागा : खासदार सुप्रिया सुळे.

राष्ट्रवादी काँग्रेस पार्टी सर्वांना बरोबर घेत गावपातळीपर्यंत पोचलेला पक्ष आहे. त्यामुळे ग्रामपंचायत पातळीवर निवडून आलेल्या सदस्यांचा सत्कार व सन्मान करीत असताना पराभूत उमेदवारांनाही वाटचालीसाठी ताकत दिली जाईल. ज्या ठिकाणी उमेदवार पराभूत झाले आहेत, त्या ठिकाणचे आत्मचिंतन करणे गरजेचे आहे. सर्वांनी मिळून पक्ष संघटना मजबूत करण्याच्या कामाला लागावे. येणाऱ्या जिल्हा परिषद पंचायत समितीच्या निवडणुकीच्या दृष्टिकोनातून सर्वांनी तयारीला लागावे. पक्ष सर्वांच्या पाठीशी खंबीरपणे उभा आहे, अशी ग्वाही बारामती लोकसभा मतदारसंघाच्या खासदार सुप्रिया सुळे यांनी दिली.

सासवड (ता. पुरंदर) येथील जयदीप मंगल कार्यालयात नवनिर्वाचित ग्रामपंचायती सदस्यांच्या सत्कारावेळी खासदार सुळे बोलत होत्या. यावेळी राष्ट्रवादी काँग्रेस पक्षाच्या विविध पदांवर नेमणुका करण्यात आल्या. खासदार सुळे पुढे म्हणाल्या राष्ट्रवादी काँग्रेस पक्ष तालुक्यात नंबर एक आहे. स्थानिक स्वराज्य संस्थेचा कारभार कळावा, पंचायत राजच्या योजना, नव्या शासन योजना व एकूणच कामात मदत होण्यासाठी नूतन ग्रामपंचायत सदस्यांना प्रशिक्षण देण्यात आपण पुढाकार घेणार आहोत. यावेळी नवनिर्वाचित ग्रामपंचायत सदस्य सोनाली खेडेकर, अजिंक्य टेकवडे, सौरभ कुंजीर, शेखर पिसे, संभाजी कोलते यांनी आपली मनोगते व्यक्त केली. तर जिल्हा नियोजन समितीवर राज्यशासनाने नियुक्त केलेले निवृत्ती बांदल, माणिकराव झेंडे पाटील यांचा विशेष सत्कार झाला. तसेच राष्ट्रवादी काँग्रेस अंतर्गत नवनियुक्त पदाधिकारी यांचा पत्र देऊन सत्कार करण्यात आला.

यावेळी कार्यक्रमास पुणे जिल्हा राष्ट्रवादी काँग्रेसचे अध्यक्ष प्रदीप गारटकर, माजी आमदार अशोक टेकवडे, माजी सनदी अधिकारी संभाजी झेंडे, जिल्हा बँकेचे संचालक डॉ. दिगंबर दुर्गाडे, सुदाम इंगळे, हेमंतकुमार माहूरकर, तात्या भिंताडे, पुष्कराज जाधव, संदेश पवार, भरत झांबरे, शिवाजी पोमण, राहुल गिरमे, बंडुकाका जगताप, बाळासाहेब भिंताडे, गौरी कुंजीर, ऋतुजा धुमाळ, पूजा भिंताडे आदी अनेक मान्यवर व गावोगावचे कार्यकर्ते उपस्थित होते.

यावेळी राष्ट्रवादी काँग्रेस पार्टीच्या पुरंदर तालुका समन्वयक म्हणून माजी आमदार अशोक टेकवडे, पुणे जिल्हा राष्ट्रवादी काँग्रेसच्या उपाध्यक्षपदी भैयासाहेब खाटपे, जिल्हा रा. काँ. युवक उपाध्यक्ष अक्षय निगडे, पुरंदर तालुका रा. काँ. सरचिटणीस विष्णू गडदरे, नीरा रा. काँ. शहराध्यक्ष प्रमोद काकडे, नीरा शहर रा.काँ. युवक अध्यक्ष ऋषिकेश धायगुडे, नीरा शहर महिला रा.काँ अध्यक्ष तनुजा शहा, नीरा शहर उपाध्यक्ष अजय राऊत यांना खा.सुप्रिया सुळे, जिल्हाध्यक्ष प्रदीप गारटकर, तालुकाध्यक्ष माणिकराव झेंडे पाटील, युवकाध्यक्ष पुष्कराज जाधव यांच्या हस्ते नियुक्ती पत्र देण्यात आले.

प्रास्ताविक माणिक झेंडे पाटील यांनी केले. सूत्रसंचालन प्रा. जितेंद्र देवकर यांनी केले तर, आभार युवकाध्यक्ष पुष्कराज जाधव यांनी मानले.

सासवड (ता. पुरंदर) येथे खा. सुप्रिया सुळे यांच्या हस्ते पुणे जिल्हा राष्ट्रवादी काँग्रेसच्या उपाध्यक्षपदी भैयासाहेब खाटपे यांना नियुक्तिपत्र देण्यात आले.