लोकमत न्यूज नेटवर्कबारामती : ‘आमचे बंधू आज लय जोरात होते. एखाद्याकडून काम करून घ्यायचे असेल तर त्याला उभा, आडवा न करता काम गोडीगुलाबीने करून घेतले पाहिजे. मात्र, त्यांच्या भाषणात सारखे चिमटे होते. जे काम असेल ते पूर्ण करण्याचा प्रयत्न करू. जास्त बोलत नाही. कारण आमचे ते मोठे बंधू आहेत,’ या शब्दांत उपमुख्यमंत्री अजित पवार यांनी ॲग्रीकल्चरल डेव्हलपमेंट ट्रस्टचे अध्यक्ष राजेंद्र पवार यांना कोपरखळी मारली.
बारामती येथे मंगळवारी अटल इनोव्हेशन सेंटरच्या उद्घाटन कार्यक्रमामध्ये अजित पवार बोलत होते. तत्पूर्वी, प्रास्ताविकामध्ये संस्थेचे अध्यक्ष राजेंद्र पवार यांनी कृषी महाविद्यालय व कृषी शिक्षणातील काही अडचणींबाबत उपमुख्यमंत्री अजित पवार यांच्यासोबत पाच बैठका झाल्या. मात्र, कोणताही निर्णय झाला नाही, अशी तक्रार केली. हाच धागा पकडून अजित पवार यांनी राजेंद्र पवार यांना, ‘आज गडी लय जोरात आहे, बंधुराज नोंद घेतलेली आहे एवढेच सांगतो,’ अशा शब्दांत कोपरखळी मारली. या वक्तव्यावर सभागृहात चांगलीच खसखस पिकली.
ठाकरेंकडूनही फिरकी मुख्यमंत्री ठाकरे यांनी ‘अजितदादा आणि राजेंद्र तुम्ही दोघांनी आधी ठरवा आणि मग माझ्याकडे या. दादांनी आडकाठी आणली तर आपण पवार साहेबांकडे जाऊन ते काम करू’, असे म्हणताच सभागृहात हास्यकल्लोळ उडाला.