पिंपरी : नगर अर्बन को-ऑप बॅंकेची २२ कोटींची फसवणूक केल्याप्रकरणी पिंपरी-चिंचवडपोलिसांच्या आर्थिक गुन्हे शाखेने शनिवारी (दि. ६) बॅंकेच्या एका तत्कानील संचालकासह दोन आरोपींना अटक केली आहे. पिंपरीतील मोरवाडी न्यायालयात हजर केले असता दोन्ही आरोपींना मंगळवारपर्यंत (दि. ९) पोलीस कोठडी सुनावली आहे. याप्रकरणात बॅंकेचे तत्कालीन संचालक असलेले माजी खासदार दिलीप गांधी यांचीही चाैकशी होणार असल्याचे पोलिसांकडून सांगण्यात आले.
नवनीत शांतीलाल सूरपुरिया (रा. अहमदनगर), तसेच यज्ञेश बबन चव्हाण (रा. संभाजीनगर, चिंचवड), असे अटक केलेल्या आरोपींची नावे आहेत. याप्रकरणी महादेव पंढरीनाथ साळवे (वय ५६, रा. अहमदनगर) यांनी चिंचवड पोलीस ठाण्यात २५ जानेवारी २०२१ रोजी फिर्याद दिली आहे. बॅंकेच्या चिंचवड येथील शाखेत २६ मार्च २०१८ ते २५ जानेवारी २०२१ दरम्यान हा प्रकार घडल्याचे फिर्यादीत नमूद आहे. त्यानुसार बबन निवृत्ती चव्हाण, वंदना बबन चव्हाण, यज्ञेश बबन चव्हाण, मंजुदेवी हरिमोहन प्रसाद (सर्व रा. चिंचवड), रामचंद्र अण्णासाहेब तांबिले (रा. वाल्हेकरवाडी), अभिजित नाथा घुले (रा. अहमदनगर), यांच्यासह कर्ज उपसमिती सदस्य, तसेच नगर अर्बन को-ऑप बॅंकेचे संचालक सदस्य यांच्या विरोधात गुन्हा दाखल आहे.
आर्थिक गुन्हे शाखेचे पोलीस निरीक्षक वसंत बाबर यांनी दिलेल्या माहितीनुसार, फिर्यादी यांना बॅंकेच्या प्रशासकांनी प्राधिकृत केले आहे. त्यांनी दिलेल्या फिर्यादीनुसार, मे. नेश लिब टेक्नोरिअल व मे. इंडियन इंजिनियरिंग इंडस्ट्रिज पुणे या फर्मचे कर्जदार आरोपी यांनी संगनमत करून स्वत:च्या फायद्यासाठी कर्जप्रकरण केले. त्यासाठी तारण गहाण मिळकतीचा बनावट मूल्यांकन अहवाल दिला. कर्ज उपसमिती सदस्य व बॅंकेच्या संचालक सदस्यांनी तो अहवाल स्वीकारून बॅंकेची २२ कोटी रुपयांची आर्थिक फसवणूक केली.
पोलीस आयुक्त कृष्ण प्रकाश यांनी याप्रकरणी तपासाचे आदेश दिल्यानंतर आर्थिक गुन्हे शाखेचे पथक शनिवारी पहाटे अहमदनगर येथे रवाना झाले. आठ अधिकाऱ्यांच्या पथकाने अहमदनगर येथून बॅंकेचे तत्कालीन संचालक नवनीत सूरपुरिया यांना अटक केली. तसेच चिंचवड येथे आरोपी यज्ञेश चव्हाण याला अटक केली. अहमदनगर येथील माजी खासदार दिलीप गांधी हे बॅंकेचे तत्पकालीन संचालक असून, त्यांच्या संचालकपदाच्या कार्यकाळात बॅंकेची फसवणूक झाली आहे. त्यामुळे याप्रकरणात त्यांचीही चाैकशी होईल, असे पोलीस निरीक्षक बाबर यांनी सांगितले.