महिन्याभरात पेट्रोलचे दर साडेतीन रुपयांनी वाढले

पुणे : राज्य आणि केंद्र सरकारने पेट्रोलवरील कर कमी करणार, असे सांगितले होते. मात्र, अद्याप याबाबत दोन्हीकडून कोणताही ठोस निर्णय झाला नाही. केंद्र सरकारने काही प्रमाणात डिझेलचे दर कमी करण्यास सुरुवात केली आहे. त्यामुळे गेल्या काही दिवसांत डिझेल ५० पैशांनी कमी झाले आहे. मात्र, पेट्रोलचे दर वाढतच आहे. महिन्याभरात पेट्रोलचे दर साडेतीन रुपयांनी (३.५८ पैसे) वाढले आहेत.

पुण्यात ४ जुलैला पेट्रोल साधे १०३.८७, पॉवर १०७.५५ रुपये, तर डिझेल प्रतिलिटर ९४.३४ रुपये होते. तर, २० ऑगस्ट रोजी पेट्रोल साधे १०७.४५, पॉवर १११.१३ रुपये, तर डिझेल प्रतिलिटर ९४.९९ रुपयांपर्यंत गेले आहेत. म्हणजे साधारण एक महिन्यात ३.५८ रुपयांनी पेट्रोलचे दर वाढले आहेत. आधीच वर्षभरापासून कोरोना महामारीमुळे अनेकांचे रोजगार गेले आहेत. त्यातच आता दररोज पेट्रोल दरवाढीमुळे नोकरदार, सर्वसामान्य माणूस मेटाकुटीला आला आहे.

------

...हे कर कमी केले तर पेट्रोलचे दर कमी होतील

राज्य सरकार स्वच्छता, शिक्षण, दारूबंदी आणि सेस यावर साधारणतः १० रुपये कर आकारत आहे. तो कमी करणे अपेक्षित आहे, असे जाणकारांचे मत आहे. सध्या राज्य सरकार पेट्रोलवर ३४-३६, तर केंद्र सरकार ३०-३२ रुपये कर आकारत आहे. याबाबत दोन्ही पातळीवरून कर कमी करण्यासंदर्भात सूतोवाच करण्यात आले आहेत. मात्र, त्याबाबत मागील महिनाभरात दोन्ही सरकारनी कोणताही निर्णय घेतला नाही. पुण्यात मागील महिनाभरात पेट्रोल आणि डिझेल प्रत्येकी ३.५८ रुपयांनी वाढले आहे.

----

पेट्रोल-डिझेलचे प्रतिलिटर भाव

दिनांक साधे पेट्रोल पॉवर डिझेल

४ जुलै १०३.८७ १०७.५५ ९४.३४

१५ जुलै १०७.१६ ११०.८४ ९५.६०

२० ऑगस्ट १०७.४५ १११.१३ ९४.९९