पुणे : आई कोठे काय करते या मालिकेतील अनिरुद्ध याने अरुंधतीला घटस्फोट दिला आहे. तरी तिचे अशितोष केळकरबरोबरचे भेटणे, त्याच्याबरोबर काम करणे त्याला आवडत नसते. तो सातत्याने त्यावरुन तिला सर्वांसमोर सुनावत असतो. तसाच काहीसा प्रसंग पिसोळीत घडत होता. पण, ही महिला अरुंधतीसारखी शांतपणे सहन करत बसली नाही. तिने मी या तरुणाबरोबर लग्न करणार असल्याचे सांगून घरातील चाकूने आपल्या पूर्वश्रमीच्या पतीवर वार करुन जखमी केले.
याप्रकरणी एका २८ वर्षाच्या तरुणाने कोंढवा पोलीस ठाण्यात फिर्याद दिली आहे. त्यावरुन पोलिसांनी एका महिलेवर गुन्हा दाखल केला आहे. ही पिसोळीमधील एका सोसायटीत २८ ऑगस्ट रोजी सायंकाळी साडेसहा वाजता घडली.
याबाबत पोलिसांनी दिलेल्या माहितीनुसार, कोंढवा येथे राहणाऱ्या एका तरुणाने आपल्या पत्नीला एक महिन्यांपूर्वी तलाक दिला आहे. ही महिला पिसोळी येथील एका सोसायटीत राहते. तलाक दिला असला तरी तो आपल्या पत्नीवर नजर ठेवून होता. तिला भेटायला एक तरुण येत असल्याची माहिती त्याला मिळाली. तेव्हा त्याने सोसायटीच्या वॉचमनला सांगून ठेवले होते. हा तरुण त्याच्या पत्नीला भेटायला २८ तारखेला सायंकाळी आला होता. वॉचमनने ही बाब या पूर्वश्रमीच्या पतीला सांगितली. तेव्हा तो तिच्या फ्लॅटवर गेला. त्या तरुणाला व तिला त्याने विचारणा केली. तेव्हा तिने आपण या तरुणाबरोबर लग्न करणार असल्याचे सांगितले. त्यावरुन त्यांच्यात वाद झाला. तेव्हा तिने घरातील चाकूने आपल्या पूर्वश्रमीच्या पतीच्या मानेवर मारुन त्याला जखमी केले. पोलीस उपनिरीक्षक बिराजदार तपास करीत आहेत.