पीएमपीएल बसची सेवा वरवंडपर्यंत करण्याची मागणी

वरवंड येथे शिक्षणासाठी तालुक्यातील मोठ्या प्रमाणात विद्यार्थी येत असून गावा मध्ये सरकारी औद्योगिक प्रशिक्षण संस्था, महानंदा दूध बुकटी प्रकल्प, पुणे जिल्हा दूध संघ, बँक ऑफ महाराष्ट्र, पुणे जिल्हा मध्यवर्ती सहकारी बँक, या शासकीय कार्यालय असून यासाठी विद्यार्थी, सरकारी नोकरदार वर्ग मोठ्या प्रमाणात प्रवास करतो. त्यामुळे त्यांच्या सेवेसाठी पीएमपीएल बसची सेवा वरवंडपर्यंत करावी, अशी मागणी आहे. यवतपर्यंत ही बस सुरु केली असून यवतपासून वरवंड अवघ्या पंधरा किलोमीटर अंतरावर आहे. त्यामुळे ही यवतचीच बस वरवंडपर्यंत करणे पीएमपीएललाही सोयीचे होणार आहे. शिवाय ही बससेवा शैक्षणिक दृष्टीने विद्यार्थ्यांना सोयीची होणार आहे.

वरवंडमध्ये शिक्षणासाठी व नोकरीनिमिताने पुणे, हडपसर, लोणी काळभोर, यवत, भांडगाव, चौफुला, पडवी, सुपा, देऊळगाव गाडा, केडगाव, पारगाव, या गावातून ये जा करत आहेत. यामुळे बससेवेला मोठा फायदा होईल तसेच सध्या खाजगी वाहतूक, रेल्वेसेवा, एसटी बससेवा पूर्ण क्षमतेने चालू नसल्याने प्रवास करताना अडचणी येत आहेत. यामुळे ही बससेवा वरवंडपर्यंत चालू होण्याची मागणी गोपीनाथ महाराज व्यापारी संघटनेने पुणे परिवहन महामंडळ वाहतूक व्यवस्थापक कार्यालय पुणे यांच्याकडे केली आहे.

--