पुणे : समोशाच्या गोड चटणीत मेलेला उंदीर आढळल्याची धक्कादायक घटना पुण्यामध्ये घडली आहे. कमला नेहरू हॉस्पिटल जवळील शारदा स्वीट सेंटरमध्ये हा प्रकार घडला. अन्न व औषध प्रशासनाने नमुने तपासणीसाठी प्रयोगशाळेत पाठवले आहेत. तसेच हे दुकान बंद ठेवण्याचे आदेश देण्यात आले आहेत.
गेल्या काही दिवसांपूर्वी बदलापूरच्या एका स्नॅक्स कॉर्नरमध्ये वडापावमध्ये चक्क मृत पाल आढळली होती. आता पुन्हा समोशाच्या चटणीत मेलेला उंदीर आढळल्याने खवय्यांमध्ये सध्या भीतीचं वातावरण आहे. उंदीर आढळल्याचा व्हिडिओ देखील समोर आला असून मेलेला उंदीर ज्या चटणीत सापडला ती चटणी अनेकांनी खाल्ल्याचे समोर येत आहे.
चतुर्थीच्या दिवशी ही घटना घडली आहे. मुंबईनंतर पुण्यातही नागरिकांच्या आरोग्याशी खेळ केला जात असल्याचे या निमित्ताने समोर आले आहे. अनेकदा पदार्थ हे अस्वच्छ ठिकाणी तयार केले जातात. योग्य ती खबरदारी घेण्यात येत नाही. त्यामुळे अशा दुकानांवर कारवाईची मागणी आता नागरिक करत आहेत.