पुणे: कोरोनाचा प्रादुर्भाव रोखण्यासाठी एकीकडे सर्वसामान्यांवर बंधने घातली जात असताना राजकारण्यांना वेगळे नियम आहेत का असा, सवाल आता उपस्थित होतो आहे. कारण पुण्यात पार पडलेल्या माजी खासदार धनंजय महाडिक यांच्या मुलाच्या लग्नात कोरोना प्रतिबंधात्मक नियम नियम धाब्यावर बसवले गेल्याचं आता स्पष्ट झालं आहे. सोशल डिस्टन्सिंगचा फज्जा, विनामास्क फिरणारी नेतेमंडळी असं चित्र या लग्नात पाहायला मिळालं.
पुण्यातल्या हडपसर येथील लक्ष्मी लॉन्स याठिकाणी धनंजय महाडिक यांचा मुलगा पृथ्वीराज महाडिक आणि वैष्णवी देशमुख यांचा विवाह सोहळा काल पार पडला. या सोहळ्याला देवेंद्र फडणवीस, चंद्रकांत पाटील, हर्षवर्धन पाटील, संजय राऊत, शरद पवार अशा अनेक नेत्यांनी हजेरी लावली होती. एकीकडे कालच मुख्यमंत्री उद्धव ठाकरे यांनी गर्दी करणे टाळा अन्यथा लॉकडाऊन लावावा लागेल असा इशारा दिला असताना थेट राजकारण्यांकडून हे सगळे नियम धाब्यावर बसवले गेल्याचे स्पष्ट झाले आहे.
कोरोना रुग्णांची वाढती संख्या लक्षात घेता पुण्यामध्ये कालपासून नाईट कर्फ्यूची घोषणा करण्यात आली आहे. त्याच बरोबर लग्नांना दोनशे लोकांची मर्यादा तसेच पोलीस परवानगी आवश्यक असल्याचे स्पष्ट करण्यात आले आहे. सर्व नियम राजकीय आणि सांस्कृतिक कार्यक्रम त्याचबरोबर अशा सोहळ्यांना ही लागू असतील असं खुद्द मुख्यमंत्री उद्धव ठाकरे यांनी जाहीर केले आहे. नियम पाळले गेले नाहीत तर कारवाई होईल अशी घोषणा झाली आहे. मात्र ही घोषणा झाल्याच्या दिवशीच हा संपूर्ण प्रकार बघायला मिळाल्यामुळे नियम फक्त सर्वसामान्यांसाठीच आहेत का असा सवाल पुन्हा एकदा उपस्थित होत आहे. नियमांचे पालन न झाल्याने आता प्रशासन संबंधितांवर कारवाई करणार का हे पहावे लागेल.