पुणे-नाशिक मार्गावर कंटेनर-ट्रकचा अपघात

लोकमत न्यूज नेटवर्क

राजगुरूनगर: पुणे-नाशिक महामार्गावर राजगुरुनगर शहरालगत थिगळस्थळ येथे सिमेंट-विटा वाहतूक करणाऱ्या कंटेनर आणि ट्रकचा अपघात झाला. दरम्यान अन्य चार वाहनांनी पघातग्रस्त ट्रकला मागून धडक दिली. त्यामुळे पुणे-नाशिक महामार्गावर दोन्ही बाजुने वाहतूककोंडी होऊन वाहनांच्या रांगाच रांगा लागल्या होत्या. या विचित्र अपघातामुळे पहाटेपर्यंत वाहतूककोंडी झाली होती.

पोलिसांनी दिलेल्या माहितीनुसार, सोमवारी रात्री साडेदहा वाजण्याच्या सुमारास महामार्गावर नाशिक बाजुने सिमेंटच्या विटा घेऊन एक कंटेनर पुणे बाजुकडे जात होता. कंटेनर चालकाचा ताबा सुटल्याने तो थेट नाशिककडे जाणाऱ्या ट्रकवरती येऊन आदळला. तसेच कंटेनरमध्ये भरलेल्या विटा रस्त्यावर कोसळल्या.

दरम्यान अचानक झालेल्या या अपघातामुळे दोन्ही वाहनांच्या मागून येणाऱ्या वाहनचालकांना अंदाज न आल्याने या वाहनांचा अपघात झाला. या विचित्र अपघातामध्ये दोन जणांना दुखापत झाली आहे. चार वाहनांचे नुकसान झाले आहे. पोलिसांंनी घटनास्थळी धाव घेऊन आपघातग्रस्त वाहने बाजुला केली. रस्त्यावर सिमेंट विटांचा खच पडला असल्यामुळे अपघातग्रस्त वाहने बाजुला करण्यास अडथळा निर्माण होत होता. स्थानिक नागरिकांच्या मदतीने अपघातग्रस्त वाहने बाजुला करून रस्त्यावरील सिमेंट विटा हटविण्यात आल्या. त्यामुळे वाहतूककोंडीला सुरुवात झाली. रस्त्याच्या दोन्ही बाजुने दोन-दोन किलोमीटर वाहनांच्या रांगा लागल्या होत्या. वाहतूककोंडी सुरळीत होण्यासाठी मंगळवारी (दि. २) पहाटेचे तीन वाजले.

पुणे -नाशिक महामार्गालगत थिगळस्थळ येथे एका बाजुने कंपन्याच्या बसेस रात्रीच्या उभ्या असतात. त्यामुळे महामार्ग अरुंद होतो. वाहनचालकांना या ठिकाणी वाहने चालविताना अडचण निर्माण होते. विशेषत: जड वाहनचालाकांना या ठिकाणी मोठी काळजी घ्यावी लागते. तसेच पानमळा येथे नवीन घाट मार्ग ज्या ठिकाणी जोडण्यात आला आहे. त्या ठिकाणी भाजीविक्रेते महामार्गालगत बसत आहे. त्यामुळे येणारे जाणारे वाहनचालक या ठिकाणी रस्त्यावरच गाड्या उभ्या करून भाजी खरेदी करत असतात. यापूर्वी या ठिकाणी किरकोळ अपघात झाले आहे. याकडे वाहतुक पोलिसांचे दुर्लक्ष झाले आहे.

फोटो ओळ: पुणे-नाशिक महामार्गावरील थिगळस्थळ येथील अपघातग्रस्त वाहने.