डॉक्टर असल्याची बतावणी करून फसवणूक

डॉक्टर असल्याची बतावणी करून २० हजार रुपयांची फसवणूक केल्याप्रकरणी भारती विद्यापीठ पोलिसांनी एकाला अटक केली. न्यायालयाने आरोपीला १ दिवस पोलीस कोठडीत ठेवण्याचा आदेश दिला

पुणे : डॉक्टर असल्याची बतावणी करून २० हजार रुपयांची फसवणूक केल्याप्रकरणी भारती विद्यापीठ पोलिसांनी एकाला अटक केली. न्यायालयाने आरोपीला १ दिवस पोलीस कोठडीत ठेवण्याचा आदेश दिला. अमित जगन्नाथ कांबळे (वय २४, रा. नवी पेठ, निंबाळकर वाडा, मनपा शाळेच्या मागे) अशी आरोपींची नावे आहेत. या प्रकरणी योगेश अनंता तळेकर (वय २८, रा. धुमाळनगर, ता. भोर) यांनी फिर्याद दिली आहे. ही घटना ५ मे रोजी दुपारी ४.३० वाजता घडली होती़ फिर्यादी यांना मोबाईलवर फोन आला व ‘डॉ. देशपांडे बोलत असून, भारती हॉस्पिटल येथील तुमच्या पेशंटच्या आॅपरेशनसाठी २० हजार रुपये आवश्यक आहेत,’ असे सांगितले. फिर्यादी या रक्कम घेऊन गेल्यानंतर डॉक्टरांचा माणूस असल्याचे सांगून एक जण रक्कम घेऊन गेला. त्यानंतर प्रत्यक्ष हॉस्पिटलमध्ये आॅपरेशनसाठी डॉक्टर न आल्याने याबाबत फिर्यादी यांनी चौकशी केली असता, देशपांडे नावाचे कोणीही डॉक्टर नसल्याचे त्यांना कळाले व त्यांची फसवणूक झाल्याचे लक्षात आले. आरोपीला मंगळवारी न्यायालयात हजर करण्यात आले. त्याच्याकडून फिर्यादीचे २० हजार रुपये हस्तगत करायचे आहेत, भारती विद्यापीठ परिसरात आणखी काही गुन्हे केले आहेत का, याबाबत तपास करायचा आहे यासाठी पोलीस कोठडी देण्यात यावी, असा सरकारी वकिलांनी केलेला युक्तिवाद न्यायालयाने ग्राह्य धरला.(प्रतिनिधी)