सीए फॅक्टर!

खडतर परिस्थितीत शिक्षण घेऊन चार्टर्ड अकाऊंटंट झालेल्या धनंजय वाळके यांनी आतापर्यंत अनेक होतकरू तरुणांना संधी देऊन त्यांचे सीए होण्याचे स्वप्न पूर्ण केले आहे. धनंजय यांना शिक्षणासाठी जास्त पैसे खर्च करणे शक्य नव्हते. मेडीकल, इंजिनिअरिंगच्या तुलनेत सीएसाठी कमी खर्च होणार असल्याने त्यांनी जिद्दीने हे शिक्षण पूर्ण केले.

त्यामुळे आता स्वत: पुण्यातील प्रथितयश सीए व्यावसायिक असलेले धनंजय वाळके पार्श्वभूमी नसलेल्या विद्यार्थ्यांना आवर्जून संधी देतात. त्यांनी आतापर्यंत बिहार, राजस्थान, कर्नाटक आणि महाराष्ट्रातील कोकण परिसरातील मुलांना संधी दिली आहे. या मलांपैकी कोणाचे वडील भेळ विक्रेते, रोजंदारीवर काम करणारे आहेत.

वाळके यांचे वय ३७ पण त्यांचा आताचा अनुभव २२ वर्षांचा आहे. याचे कारण म्हणजे दहावी झाल्यापासूनच ते आर्थिक क्षेत्रात काम करत आहेत.

सीए झाल्यावर वाळके यांनी कार्पोरेट क्षेत्रात तीन-चार वर्षे नोकरी केली. मोठ्या कंपन्यांमध्ये काम करताना एक गोष्ट त्यांच्या लक्षात आली की, सीएसाठी आपले बेसिक अंडरस्टँडिंग असणे खूप महत्त्वाचे आहे. नफा होणार की तोटा हे माहीत नसेल तर आपल्याला ग्राहकाला सल्ला देता येत नाही. यानंतर स्वतःची कन्सल्टन्सी सुरू केली.

सुरुवातीला त्यांना वडिलांकडून लाख मोलाची मदत मिळाली. त्यांचे वडील जास्त शिकलेले नव्हते. त्यांनी चाळीस वर्षे किर्लोस्कर या कंपनीत काम केले. पण मध्यमवर्गीय कुटुंब असल्याने साहजिकच अडचणी येत होत्या. सी. ए. करून नंतर व्यवसायात उतरायचे हे कुटुंबीयांना सुरुवातीला जोखमीचे काम वाटत होते. पण घरच्यांनी पूर्ण पाठिंबा दिला. धनंजय यांच्या पत्नीही सीए आहेत.

धनंजय हे आता मराठा आंत्रप्रिन्यूअर असोसिएशन मॅनेजमेंट कमिटीमध्ये कार्यरत असून या कमिटीमध्ये जवळपास ९०० मान्यवर मंडळींचा समावेश आहे. सी. ए. झाल्यामुळे एखादी गोष्ट कशी बनते, ती कशी विकली जाते अथवा त्यातील खाचाखोचा सगळे माहीत असल्याचे ते सांगतात. यामुळे प्रत्येक बिझनेस स्टँडचे वेगळेपण काय आहे हे समजते.