बाळासाहेब ठाकरे हे गोरगरिबांची ऊर्जाशक्ती

इंदापूर : हिंदुहृदयसम्राट बाळासाहेब ठाकरे हे गोरगरीब, उपेक्षित, कष्टकरी या सर्वांची ऊर्जा व शक्ती होती. आजही ती शक्ती कायम टिकून आहे, असे गौरवोद्गार सार्वजनिक बांधकाम राज्यमंत्री दत्तात्रय भरणे यांनी काढले.

स्वाभिमान युवा संमेलन हिंदुहृदयसम्राट बाळासाहेब ठाकरे व सुभाषचंद्र बोस यांच्या जयंतीनिमित्त शनिवारी (दि. २३) इंदापूर तालुक्यातील शिरसटवाडी येथे शिवसंग्राम व्याख्यानमालेचे उद्घाटन सार्वजनिक बांधकाम राज्यमंत्री दत्तात्रय भरणे यांच्या हस्ते पार पडले. कार्यक्रमाच्या अध्यक्षस्थानी इंदापूर वकील बार असोसिएशन अध्यक्ष अँँड. प्रमोद खरात होते.

दत्तात्रय भरणे म्हणाले की, असंख्य गोरगरीब कुटुंबांतील लोकांना आधार देण्याची भूमिका, हिंदुहृदयसम्राट बाळासाहेब ठाकरे यांनी कायमस्वरूपी टिकवली. त्यामुळेेच महाविकास आघाडीचे सरकार आज जनतेची सेवा करते आहे. इंदापूर तालुक्यांमध्ये अनेक वर्षापासून, नेताजी सुभाषचंद्र बोस तसेच हिंदुहृदयसम्राट बाळासाहेब ठाकरे यांचा जयंती उत्सव साजरा केला जातो. यातून खऱ्या अर्थाने युवाशक्तीला प्रेरणा मिळते, असेही ते म्हणाले.

व्याख्याते भास्करराव पेरे-पाटील यांनी "माझी ग्रामपंचायत, माझी जबाबदारी" या विषयावर प्रबोधन केले. ते म्हणाले, आपल्याजवळील अगदी थोडे दुसऱ्याला देण्याची भूमिका ठेवा. तरच गावात सुखसमाधान व आनंद बघता येईल. गावची स्वच्छता, वृक्षारोपण व गावचे आरोग्य याची काळजी गावकऱ्यांनी, कोणाचाही एक रुपया न घेता करता येते. त्यामुळे कोण काही देईल हे न पाहता आपले गाव आपले कुटुंब असा विचार करून, गावासाठी थोडा वेळ द्या,असे आवाहनही त्यांनी केले. उपस्थितांचे स्वागत आयोजक अँड. नितीन कदम यांनी केले.

२५इंदापूर

शिरसटवाडी व्याख्यानमालेत मार्गदर्शन करताना राज्यमंत्री दत्तात्रय भरणे व मान्यवर.