पुणे : तळोजा कारागृहातून सुटल्यानंतर, कोथरूडमध्ये शक्तिप्रदर्शन केल्याप्रकरणी गुंड गजानन उर्फ गजा मारणे व त्याच्या साथीदारांची न्यायालयाने प्रत्येकी १५ हजार रुपयांच्या जातमुचलक्यावर बुधवारी (दि. १७) जामिनावर मुक्तता केली.
प्रथमवर्ग न्यायदंडाधिकारी आर. के. बाफना-भळगट यांनी हा आदेश दिला. गजा मारणेला न्यायालयात आणताना मोठा पोलीस बंदोबस्त ठेवण्यात आला होता. गजा मारणे आणि शरद मोहोळ या दोघांना दोन वेगवेगळ्या प्रकरणात एकाचवेळी न्यायालयात आणण्यात आल्याने पोलिसांमध्ये काहीसे तणावाचे वातावरण होते.
गुन्हेगारी प्रवृत्तीचे उदात्तीकरण होता कामा नये याकरिता पुणे पोलिसांनी आक्रमक पवित्रा घेत मारणेसह त्याच्या दोनशे साथीदारांविरुद्ध कोथरुड पोलीस ठाण्यात मंगळवारी (दि. १६) रात्री उशिरा गुन्हा दाखल केला. त्यापैकी मारणेसह ९ जणांना पोलिसांनी अटक केली, तर गुन्हा दाखल झालेल्यापैकी २७ जणांची नावे निष्पन्न झाली. यात गजा पंढरीनाथ मारणे (वय ४८), प्रदीप दत्तात्रय कंधारे (वय ३६), बापू श्रीमंत बागल (वय ३४), अनंता ज्ञानोबा कदम (वय ३७), गणेश नामदेव हुंडारे (३९), रुपेश कृष्णराव मारणे (वय ३८), सुनील नामदेव बनसोडे (वय ४०) श्रीकांत संभाजी पवार (वय ३४) आणि सचिन आप्पा ताकवले (वय ३२) यांना अटक करण्यात आली होती.
अमोल बधे आणि पप्पू गावडे या दोघांच्या खून प्रकरणात सबळ पुरावे नसल्याने न्यायालयाने त्याची निर्दोष मुक्तता केल्यानंतर, सोमवारी सायंकाळी मारणे याची मुंबईतील तळोजा कारागृहातून सुटका करण्यात आली. या वेळी त्याच्या हजारो समर्थकांनी तळोजा कारागृहासमोरच मोठ्या प्रमाणात शक्तिप्रदर्शन करीत आरडाओरडा केला. फटाके फोडण्याबरोबरच ड्रोन कॅमेऱ्याने चित्रीकरणही केले. चित्रीकरण करीतच पुणे-मुंबई द्रुतगती महामार्गावरबन ४०० ते ५०० अलिशान गाड्यांमधून जंगी मिरवणूक काढत दहशत निर्माण करण्याचा प्रयत्न केला. त्यानंतर कोथरुडमध्ये मंगळवारी (दि. १६) रात्री गजा मारणे व समर्थकांनी बेकायदेशीरपणे जमाव जमवून हमराज चौकातील गणपती मंदिरात विनापरवाना आरती केली. यावेळी जमावबंदीच्या आदेशाचे उल्लंघन करत दहशत पसरवण्याचा प्रयत्न केला.
गुन्ह्यातील दोनशे ते अडीचशे साथीदार आरोपींना अटक करून त्यांच्याकडे तपास करायचा आहे. गुन्ह्यात वापरलेल्या तीनशे गाड्या जप्त करायच्या आहेत. शक्तिप्रदर्शनासाठी कोणी आर्थिक सहाय्य केले याचा तपास करायचा आहे, यासाठी सात दिवसांची पोलीस कोठडी द्यावी, असा युक्तिवाद सरकारी वकील संजय दीक्षित यांनी केला. आरोपींच्या वतीने ॲड. विजयसिंह ठोंबरे यांनी बाजू मांडली. न्यायालयाने मारणे आणि त्याच्या साथीदारांना न्यायालयीन कोठडी दिली. त्यानंतर त्यांची जामिनावर मुक्तता करण्यात आली.
दरम्यान, मारणे व त्याच्या साथीदारांविरुद्ध तळेगाव दाभाडे पोलीस ठाण्यात देखील याच प्रकारचा गुन्हा दाखल आहे. त्या गुन्ह्याच्या तपासासाठी ताब्यात देण्याची मागणी देखील पिंपरी-चिंचवड पोलिसांनी केली होती. मात्र, न्यायालयाने ती फेटाळली.
-------------------------------------------------------------------------