कथित गुरू येमूलची जामिनावर मुक्तता

लोकमत न्यूज नेटवर्क

पुणे : “बायकोचे पायगुण चांगले नाहीत, तिच्यामुळे तू आमदार, मंत्री होऊ शकणार नाही,” असा सल्ला देऊन धनिक कुटुंबातील सुनेच्या छळास कारणीभूत ठरलेला कथित गुरू रघुनाथ येमूल याची प्रथमवर्ग न्यायदंडाधिकारी एस. व्ही. निमसे यांनी पंधरा हजार रुपयांच्या जातमुचलक्यावर जामीन मंजूर केला.

दोन दिवसाच्या पोलीस कोठडीनंतर मंगळवारी (दि. १३) येमूलला न्यायालयीन कोठडीत ठेवण्यात आले होते. बुधवारी (दि. १४) येमूलच्या अर्जावर सुनावणी घेऊन त्याची जामिनावर मुक्तता करण्यात आली.

औंधमधील एका धनिक कुटुंबातील सुनेचा छळ करण्यास प्रवृत्त केल्याप्रकरणी अटकेत असलेल्या रघुनाथ राजाराम येमूल (४८, रा. धवलगिरी अपार्टमेंट, आयवरी इस्टेट, बाणेर) याच्या विरुद्ध चतु:शृंगी पोलीस ठाणे येथे भा.द.वि. कलम ४९८(अ), ३९२, ३५४, ३२६(अ), ३२३, ३२५, ४०६, ४२०, १२०(ब), ५०६ सह ३४ तसेच महाराष्ट्र नरबळी आणि इतर अनिष्ट व अघोरी प्रथा व जादूटोणा यांना प्रतिबंधक घालण्याबाबत व त्याच्या समूळ उच्चाटनासाठी अधिनियम २०१३ चे कलम ३ नुसार गुन्हा दाखल करण्यात आला.

चेन्नईच्या एका तांत्रिकाशी रघुनाथ येमूलने गणेश गायकवाड याची ओळख करून दिली होती. येमूल हा हस्तरेषातज्ज्ञ आहे. त्याची प्रमाणपत्र जमा करायची आहेत. त्याच्याबाबत आणखी कुणाची तक्रार असेल तर समोर येण्याचे आम्ही आवाहन केले आहे. त्याचा तपास करायचा आहे, असे सांगत सरकारी वकिलांनी त्याच्या पोलीस कोठडीमध्ये तीन दिवस वाढ करण्याची मागणी प्रथमवर्ग न्यायदंडाधिकारी एस. व्ही. निमसे यांना केली. मात्र, चोवीस तासांत एकही तक्रारदार समोर आलेला नाही. कुणी तक्रारदार पुढे आल्यास येमूल याला पुन्हा पोलीस कोठडी देता येऊ शकते असा युक्तिवाद आरोपीचे वकील ॲड. प्रताप परदेशी आणि कीर्ती गुजर यांनी केला. तो मान्य करीत न्यायालयाने येमूलला न्यायालयीन कोठडी सुनावली होती. बुधवारी त्याच्या जामीन अर्जावर सुनावणी झाली. येमूलविरुद्ध फिर्यादीत तसेच पुरवणी जबाबातही उल्लेख नसून त्याचा गुन्ह्यात प्रत्यक्ष अथवा अप्रत्यक्ष सहभाग नाही, हा ॲड. परदेशी व गुजर यांचा युक्तिवाद न्यायालयाने ग्राह्य धरला.