पुणे : प्रेमप्रकरणातून तरुणीला पळवून नेल्याने तरुणाच्या बहिणीचे अपहरण करून तिला बेदम मारहाण करण्यात आली. अपहरण केल्यानंतर २४ वर्षांच्या बहिणीला विवस्त्र करून खोलीत डांबून ठेवून मोबाइलवर चित्रीकरण करण्यात आले. आरोपींनी ते सोशल मीडियावर व्हायरल केल्याचा धक्कादायक प्रकार उघडकीस आला आहे. या प्रकरणी लोणी काळभोर पोलिसांनी ७ जणांवर गुन्हा दाखल केला आहे.
या प्रकरणी सात जणांच्या विरोधात लोणी काळभोर पोलिसांनी गुन्हा दाखल केला आहे. नंदकुमार माटे, सुंदराबाई माटे, आरती पिंपळे, बाळासाहेब पिंपळे, सागर जगताप, श्रीराम गोसावी (सर्व रा. उरळी कांचन) अशी गुन्हा दाखल करण्यात आलेल्यांची नावे आहेत. याबाबत पीडित तरुणीच्या बहिणीने लोणी काळभोर पोलिस ठाण्यात फिर्याद दिली आहे.
माटे यांच्या नात्यातील तरुणीस तक्रारदार महिलेच्या भावाने पळवून नेल्याचा संशय आरोपींना होता. आरोपींनी तक्रारदार महिला आणि तिच्या बहिणीचे अपहरण केले. माटे यांनी नात्यातील तरुणीचा ठावठिकाणा विचारला. दोघींनी ठावठिकाणा सांगितला नाही. त्यामुळे आरोपींनी दोघींना गजाने मारहाण केली. एका खोलीत त्यांना दोन दिवस डांबून ठेवले. तक्रारदार महिलेच्या बहिणीस विवस्त्र करून तिचे मोबाइलवर चित्रीकरण केले. चित्रीकरण त्यांनी सोशल मीडियावर प्रसारित केल्याचे फिर्यादीत म्हटले आहे. गुन्हे शाखेचे पोलिस निरीक्षक सुभाष काळे तपास करीत आहेत.