चाकण (पुणे) : भरधाव वेगाने जाणाऱ्या ट्रकने रस्ता ओलांडणाऱ्यास जोराची धडक दिल्याने खाली पडलेल्या इसमाच्या डोक्यावरून ट्रकचे चाक गेल्याने तो जागीच गतप्राण झाला असल्याची घटना मेदनकरवाडी (ता. खेड) येथे (दि.१२) रात्री दहा वाजेच्या सुमारास घडली आहे.
ज्ञानेश्वर ऊर्फ माउली सोमनाथ खडे (वय ३३, सध्या रा. कडाचीवाडी, ता. खेड, मूळ रा. पिंपळगाव कोजिरा, ता. संगमनेर, जि. अहमदनगर) असे अपघातात ठार झालेल्याचे नाव आहे.
याप्रकरणी चंद्रकांत शंकर कळसकर (वय ५०, रा. मेदनकरवाडी) यांनी चाकण पोलिसांत दिलेल्या फिर्यादीवरून ट्रक चालक शंकर सुरेश वायभर (वय ३४, सध्या रा. मोई, ता. खेड, जि. पुणे) याच्या गुन्हा दाखल करून अटक करण्यात आली आहे. पोलिसांनी दिलेल्या माहितीनुसार, फिर्यादी चंद्रकांत कळसकर यांचा जावई ज्ञानेश्वर ऊर्फ माउली सोमनाथ खडे हा मेदनकरवाडी फाटा येथे चाकण - शिक्रापूर रस्ता क्रॉस करत असताना चाकण बाजूकडून शिक्रापूर बाजूकडे जाणारा ट्रक (एमएच १२ एफझेड ३२८७) हिच्यावरील चालक शंकर वायभर याने त्याचे ताब्यातील ट्रक वेगात चालवून खडे यांना जोराची धडक दिली. यामध्ये तो खाली पडल्याने ट्रकचे चाक त्याचे डोक्यावरून गेले तसेच डावे पायाला गंभीर जखमी झाल्याने जागीच मृत्यू झाला आहे. पुढील तपास चाकण पोलिस करत आहेत.