पुणे : मित्राचा वाढदिवस साजरा करण्यासाठी गेलेल्या १७ वर्षीय अल्पवयीन मुलावर चार जणांनी हल्ला करुन कोयत्याने वार केल्याची घटना पुण्यातील संभाजीनगर येथे घडली. याप्रकरणी सहकारनगरपोलिसांनी एकाला अटक करुन तीन अल्पवयीन मुलांना ताब्यात घेतले आहे. हा प्रकार धनकवडी येथे शुक्रवारी (दि. १९) रात्री दहाच्या सुमारास संभाजीनगर येथील हनुमान मंदिराजवळ घडला आहे. याप्रकरणी अल्पवयीन मुलाने सहकारनगरपोलिस ठाण्यात फिर्याद दिली असून, विक्की कांबळे (२४) याला अटक केली आहे. तर तीन अल्पवयीन मुलांना सहकारनगर पोलिसांनी ताब्यात घेतले आहे.
पोलिसांनी दिलेल्या माहितीनुसार, फिर्यादी हा शुक्रवारी (दि.१९) त्याच्या मित्राचा वाढदिवस साजरा करण्यासाठी हनुमान मंदिराजवळ गेला होता. त्यावेळी आरोपी अल्पवयीन मुलांनी फिर्यादी याला आडवून रागाने पाहिले. त्यावेळी फिर्यादी याच्या मित्राने आरोपीला रागाने का बघतो अशी विचारणा केली. याचा राग आल्याने आरोपी व फिर्यादी याच्या मित्रासोबत शाब्दिक बाचाबाची झाली. त्याचा राग आरोपीच्या मनात होता.
त्यानंतर २० जानेवारी रोजी रात्री दहाच्या सुमारास फिर्यादी हनुमान मंदिराजवळ पताका लावत होता. त्यावेळी अल्पवयीन आरोपी व त्याचे इतर साथीदार हातात कोयते घेऊन आले. त्यांनी फिर्यादी याला शिवीगाळ करुन त्याच्या तोंडावर मारले. तसेच इतर आरोपींनी फिर्यादी याच्या डोक्यावर कोयत्याने वार करुन गंभीर जखमी केले. याप्रकरणाचा पुढील तपास पोलिस उपनिरीक्षक पठारे करत आहेत.