बेल्हा (पुणे) : पारगाव तर्फे आळे (ता. जुन्नर) येथील नेहेरकर मळा या ठिकाणी दोन बिबट्यांमधील भांडणामध्ये एका नर बिबट्याचा मृत्यू झाला आहे, अशी माहिती वन कर्मचाऱ्यांनी दिली.
मंगळवार (दि.२०) सकाळी शेतमजूर ऊस लावण्याकरिता शेताकडे गेले असता त्यांना उसाच्या सरीमध्ये त्यांना बिबट्या त्या ठिकाणी दिसला. त्यांनी ताबडतोब वनपाल राजेंद्र गाढवे यांना फोन केला. त्या ठिकाणी पोलिस पाटील हेमंत चव्हाण, सागर चव्हाण गावातील ग्रामस्थ उपस्थित होते. मृत बिबट्यावर बेल्हा येथे वनविभाग शासकीय निवासस्थान येथे आणून पशुवैद्यकीय अधिकारी यांनी शवविच्छेदन केले. तद्नंतर मृत बिबट्याचे अग्निदहन केले.