पुणे : अविवाहित तरुणी उपचारासाठी हॉस्पिटलमध्ये आली. रुग्णांच्या बाथरुममध्ये जाऊन तिने एका मुलीला जन्म दिला. त्या नवजात अर्भकाला तिने बाथरुमच्या खिडकीतून बाहेर फेकून देण्याचा धक्कादायक प्रकार समोर आला आहे. हा प्रकार नर्‍हे येथील श्री काशीबाई नवले हॉस्पिटलमधील कॅज्युअल्टी वॉर्ड शेजारील रुग्णांच्या बाथरुममध्ये शनिवारी सकाळी साडेदहा वाजता घडला. याप्रकरणी सिंहगड रोड पोलिसांनी गर्ल्स हॉस्टेलमध्ये राहणार्‍या एका १९ वर्षाच्या तरुणीवर गुन्हा दाखल केला आहे.
याबाबत पोलिसांनी दिलेल्या माहितीनुसार, आरोपी १९ वर्षाची तरुणी मानाजीनगर येथील हॉस्टेलमध्ये राहते. शारीरिक संबंधातून ती गर्भवती राहिली होती. आपले दिवस भरत आल्याचे लक्षात आल्यावर ती नवले हॉस्पिटलमध्ये आली. पाठीचे दुखणे व अशक्तपणा आल्याची तक्रार तिने केली. ती ८ महिन्यांची गर्भवती असल्याचे तिने लपवून ठेवले.
त्यानंतर ती हॉस्पिटलच्या कॅज्युअल्टी वॉर्ड शेजारील पेशंटच्या टॉयलेटमध्ये गेली. तेथे तिने एका मुलीला जन्म दिला. त्या नुकत्याच जन्मलेल्या अर्भकाला तिने टॉयलेटच्या खिडकीतून बाहेर फेकून दिले. त्यामुळे या अर्भकाचा मृत्यु झाला. हा प्रकार समोर आल्यानंतर तिच्यावर रुग्णालयात उपचार करण्यात येत असून पोलीस उपनिरीक्षक लाड तपास करीत आहेत.