बेकायदेशीर वाळूउपसा करणारे ३0 ट्रक जप्त

दौंड-कुरकुंभ परिसरात बेकायदेशीर वाळूवाहतूक करणारी ३० वाहने ताब्यात घेण्यात आली आहेत.

दौंड : दौंड-कुरकुंभ परिसरात बेकायदेशीर वाळूवाहतूक करणारी ३० वाहने ताब्यात घेण्यात आली असून, प्रत्येकी ३० हजार रुपये दंडाप्रमाणे दंडापोटी एकूण ९ लाख रुपये महसूल जमा होईल, अशी माहिती तहसीलदार उत्तम दिघे यांनी दिली.
भविष्यात तालुक्यात बेकायदेशीर वाळूवाहतूक करणाऱ्या वाहनांवर कारवाई केली जाईलच; परंतु वाळूवाहतूक करणारी सर्वच वाहने तपासली जाणार आहेत. दरम्यान, यात अवैध वाळूवाहतूक करणारा सापडल्यास त्याच्यावर कायद्याचा बडगा उगारला जाईल. याकामी महसूल पथक नेमण्यात आले आहे. रविवारी आणि सोमवारी दौंड येथील रेल्वे उड्डाणपुलाजवळ कुरकुंभ परिसरात बेकायदेशीर वाहने पकडली आहेत. तसेच, पकडलेली वाहने पळून जाऊ नयेत म्हणून या कामी सतर्कता बाळगली आहे. यापूर्वी जप्त केलेली महसूल खात्याच्या ताब्यातील ३ वाहने वाळूमाफियांनी पळवून नेली होती. पैकी १ वाहन गेल्या पंधरवड्यात दौंड पोलिसांनी पकडले, तर दुसरा ट्रक वाळू भरण्यासाठी देऊळगावराजे परिसरातील हद्दीत आल्यावर महसूल खात्याने तो पकडून पोलिसांच्या ताब्यात दिला आहे.

बेकायदेशीर वाळूउपशाला आळा घालणार
सध्याच्या परिस्थितीत बेकायदेशीर वाळूउपसा करणाऱ्या वाळू माफियांवर महसूल खात्याने नजर ठेवली असून, जो कोणी बेकायदेशीरपणे शासनाचे नियम तोडून वाळूवाहतूक करेल, त्याच्यावर कडक कारवाई केली जाईल. बेकायदेशीर वाळूउपशाला आळा घालण्यासाठी एक मंडलाधिकारी, सहा तलाठी, सहा कोतवाल असे एक पथक नेमले असून, त्या पथकात दोन पोलिसांनादेखील सहभागी होण्याच्या सूचना देण्यात आल्या आहेत. बेकायदेशीर वाळूउपशाला आळा घालण्यासाठी नियोजन केल्याचे तहसीलदार उत्तम दिघे यांनी सांगितले.