चाकूचा धाक दाखवून २० किलो चांदीची लूट

चाकूचा धाक दाखवून कामगारांचे हातपाय कापडाने बांधून २० किलो चांदी व दोन मोबाईल, असा नऊ लाख रुपयांचा ऐवज चोरट्यांनी चोरून नेला

आळंदी : चºहोली खुर्द (ता. खेड) येथील फिनिक्स इंटरप्रायझेस या कंपनीतील कामगारांना चाकूचा धाक दाखवून कामगारांचे हातपाय कापडाने बांधून २० किलो चांदी व दोन मोबाईल, असा नऊ लाख रुपयांचा ऐवज चोरट्यांनी चोरून नेला. ही घटना मंगळवारी रात्री एक वाजण्याच्या सुमारास घडली असल्याची माहिती आळंदी पोलीस ठाण्याचे सहायक पोलीस निरीक्षक कुमार कदम यांनी दिली. पोलिसांनी दिलेल्या माहितीनुसार या कंपनीत काम करणार्‍या कामगारांना चार महिन्यांपूर्वी कामावरून कमी केले होते. उत्तर प्रदेशातील चार कामगारांनी ही चोरी केली असून, सुमारे नऊ लाख रुपयांचा ऐवज चोरून नेला आहे. या प्रकरणी नवल रजपूत, महेश रजपूत, वीरेंद्र रजपूत, विध्वंस रजपूत (सर्व रा. हमीदपूर, उत्तर प्रदेश) या चार जणांवर आळंदी पोलीस ठाण्यात गुन्हा दाखल करण्यात आला असून, सर्व जण फरार आहेत. सुरेश सेन, दवकरन वर्मा, ग्यादीत वर्मा हे रात्रीच्या वेळी कंपनीत काम करीत असताना यातील आरोपी यांनी कंपनीत पाठीमागील बाजूने प्रवेश करून कामगारांना चाकूचा धाक दाखवून त्यांचे हात-पाय बांधले. कंपनीतील लोखंडी पेटीचा कोयंडा हेक्सा ब्लेडने कापून त्यातील २० किलो चांदी व दोन मोबाईल असा माल दरोडा घालून चोरून नेला. सध्या कंपनीत कामाला असलेले तीन कामगार आणि चोरी करणारे आरोपी हे एकाच गावचे आहेत. त्यांच्या तपासासाठी पुणे रेल्वे स्टेशन व इतर ठिकाणी पोलीस पथके पाठविली असून, घटनास्थळाला जुन्नर उपविभागीय पोलीस अधिकार्‍यांनी भेट दिली व तपासकामाबाबत सूचना, मार्गदर्शन केले. पुढील तपास आळंदी पोलीस ठाण्याचे स. पो. नि. कुमार कदम हे करीत आहेत. (वार्ताहर)