पुणे : राज्य माध्यमिक व उच्च माध्यमिक शिक्षण मंडळातर्फे इयत्ता दहावी आणि बारावीच्या पुरवणी परीक्षेच्या लेखी परीक्षेचे वेळापत्रक जाहीर झाले आहे. त्यानुसार दहावीची प्रात्यक्षिक, श्रेणी, तोंडी व अंतर्गत मूल्यमापन परीक्षा दि. १८ जुलै ते १ ऑगस्ट दरम्यान, तर बारावीची प्रात्यक्षिक, श्रेणी, तोंडी व अंतर्गत मूल्यमापन परीक्षा दि. १८ जुलै ते ५ ऑगस्ट दरम्यान आयोजित केली जाणार आहे.
अधिक माहितीनुसार, पुणे, नागपूर, छत्रपती संभाजीनगर, मुंबई, कोल्हापूर, अमरावती, नाशिक, लातूर व कोकण अशा नऊ विभागीय मंडळांमार्फत ही लेखी पुरवणी परीक्षा घेण्यात येणार आहे. त्यानुसार इयत्ता बारावीची सर्वसाधारण व द्विलक्षी विषयाची लेखी परीक्षा दि. १८ जुलै ते ८ ऑगस्ट, बारावीची व्यवसाय अभ्यासक्रमाची लेखी परीक्षा जुलै ते ५ ऑगस्ट तर दहावीची परीक्षा दि. १८ जुलै ते १ ऑगस्ट होणार आहे.
परीक्षेचे सविस्तर वेळापत्रक मंडळाच्या https://www.mahahsscboard.in या संकेतस्थळावर मंगळवारपासून (दि. ६) उपलब्ध करून दिले आहे. मंडळाच्या वेळापत्रकाची सुविधा ही फक्त माहितीसाठी आहे, असे राज्य मंडळाच्या सचिव अनुराधा ओक यांनी सांगितले.
परीक्षेपूर्वी माध्यमिक शाळा/उच्च माध्यमिक शाळा/कनिष्ठ महाविद्यालय यांच्याकडे छापील स्वरूपात देण्यात येणारे वेळापत्रक अंतिम असेल. त्या छापील वेळापत्रकावरून परीक्षेच्या तारखांची खात्री करून घ्यावी व विद्यार्थ्यांनी परीक्षेस प्रविष्ट व्हावे. अन्य संकेतस्थळावरील किंवा अन्य यंत्रणेने छपाई केलेले तसेच व्हॉट्सॲप किंवा तत्सम माध्यमातून व्हायरल वेळापत्रक ग्राह्य धरू नये, असे आवाहन ओक यांनी केले आहे.