प्रविण मरगळे
मुंबई – परळीच्या पूजा चव्हाण(Pooja Chavan) या तरूणीने पुण्यात आत्महत्या(Suicide) केली, या आत्महत्येसाठी राज्यातील भाजपा नेत्यांनी थेट शिवसेना मंत्री संजय राठोड(Shivsena Sanjay Rathod) यांना जबाबदार धरलं. संजय राठोड यांची हकालपट्टी करून त्यांना अटक करावी अशी मागणी भाजपाने(BJP) केली. राठोड यांच्यावर कारवाई करण्याबाबत शिवसेनेतही दोन मतप्रवाह असल्याचं समोर आलं होतं.(Will CM Uddhav Thackeray take action against Sanjay Rathod in Pooja Chavan Suicide Case and push Minister Eknath Shinde dominance in Shiv Sena?)
मुख्यत: संजय राठोड यांच्यामागे कॅबिनेट मंत्री एकनाथ शिंदे(Eknath Shinde) यांची भूमिका महत्त्वाची आहे, संजय राठोड यांच्यावर कारवाई करू नये यासाठी शिंदे सक्रीय असल्याचं बोललं जात आहे. पूजा चव्हाण आत्महत्या प्रकरणात एकनाथ शिंदे यांना पत्रकारांनी प्रश्न विचारले असता, ही आत्महत्या दुर्दैवी आहे, परंतु थेट संजय राठोड यांचे नाव या प्रकरणाशी जोडणं चुकीचं आहे, पोलीस योग्य तो तपास करतील असं त्यांनी सांगितले होते. धनंजय मुंडे(Dhananjay Munde) यांच्या प्रकरणात राजीनामा घेतला नाही, मग संजय राठोड यांना राजीनामा का द्यायला लावायचा? असा प्रश्न एका गटाकडून विचारला जात आहे, शिवाय असं झालं तर वेगवेगळ्या मुद्द्यांवर विरोधक राजीनामे मागत सुटतील, त्यामुळे चुकीचा पायंडा पडेल असंही म्हटलं जात आहे.
“संजय राठोडांचं नेतृत्व संपवण्याचं कटकारस्थान”; सरपंचाचा गंभीर आरोप, भाजपाचा राजीनामा
संजय राठोड हे यवतमाळच्या दिग्रस मतदारसंघाचे आमदार आहेत, यवतमाळ जिल्ह्यातील राजकारण पाहिले तर याठिकाणी प्रखरतेने शिवसेनेत दोन गट असल्याचं दिसून येते. एक गट खासदार भावना गवळी यांचा तर दुसरा संजय राठोड यांचा. संजय राठोड यांच्यावर आरोप झाल्यापासून गवळी गट सक्रीय झाला आहे. पक्ष आणि सरकार अडचणीत येत असेल तर संजय राठोड यांचा राजीनामा द्यायला हवा यासाठी विदर्भातील काही नेते सक्रीय आहेत. भावना गवळी(Bhavana Gawali) आणि संजय राठोड यांच्यात राजकीय वर्चस्वाचा वाद जिल्ह्यात नेहमीच रंगला आहे.
यवतमाळ-वाशिम मतदारसंघाच्या खासदार असलेल्या भावना गवळी यांनी संजय राठोड यांच्या राजकीय वर्चस्वाला नेहमीच आव्हान दिलं आहे. राठोडांनी दिग्रस मतदारसंघातच राहावं असं त्यांना वाटतं, परंतु संजय राठोड यांचं यवतमाळमधील राजकीय वजन नेहमी वरचढ राहिलेले आहे, काही मोजके समर्थक वगळता संजय राठोड यांच्यामागे शिवसैनिक राहिले आहेत. उद्धव ठाकरे, आदित्य ठाकरे यांचा कार्यक्रम वगळता भावना गवळी आणि संजय राठोड हे कधीच एकाच व्यासपीठावर येत नाहीत. शिवसेनेच्या बॅनरवरदेखील यांच्यातील वाद दिसून येतो.
'ही' शिवसेना-राष्ट्रवादीची मध्यावधी निवडणुकीची तयारी, की...?; हालचालींना वेग; स्वबळ वाढवण्याचे वेध
पूजा चव्हाण आत्महत्या प्रकरणात संजय राठोड अडचणीत सापडले आहेत. त्यामुळे भावना गवळी गटाला आयती संधी चालून आली आहे. यातच संजय राठोड हे शिवसेनेत एकनाथ शिंदे गटाचे मानले जातात. शिवसेनेत एकनाथ शिंदे यांच्यामागे बहुतांश आमदार आहेत, त्याचसोबत संजय राठोड यांच्या पाठिशी बंजारा समाजाची ताकद आहे. यवतमाळ, नांदेड, परभणी, हिंगोली याठिकाणी बंजारा समाजाचं वर्चस्व आहे, त्यामुळे संजय राठोड यांच्यावर कारवाई करण्याबाबत मुख्यमंत्री उद्धव ठाकरे(CM Uddhav Thackeray) सावध भूमिका घेत आहेत.
एकनाथ शिंदे यांचे नाव मुख्यमंत्रिपदाच्या शर्यतीत आहे. शिवसेनेतील अनेक आमदार एकनाथ शिंदे यांच्या पाठिशी आहेत. दरम्यान, शिवसेनेत कोणतेही गटतट नाहीत, उद्धव ठाकरे संजय राठोड प्रकरणात निर्णय घेतील असं शिवसेना खासदार संजय राऊत(Shivsena MP Sanjay Raut) यांनी स्पष्ट केलं आहे. त्यामुळे संजय राठोड यांच्यावर कारवाई करून मुख्यमंत्री उद्धव ठाकरे एकनाथ शिंदे यांच्या शिवसेनेतील वर्चस्वाला धक्का देण्याचा प्रयत्न करणार का? असा प्रश्न उपस्थित होतो