चंदिगड - पंजाबकाँग्रेसमध्ये मुख्यमंत्री कॅप्टन अमरिंदर सिंग (Amarinder Singh) आणि काँग्रेस नेते नवज्योत सिंग सिद्धू यांच्यात सुरू असलेला संघर्ष सध्या शिगेला पोहोचला आहे. या संघर्षामध्ये नवज्योत सिंग सिद्धूंचे (Navjot Singh Sidhu) पारडे जड होतेय असे वाटत असतानाच अनुभवी अमरिंदर सिंग यांनी खेळलेल्या एका खेळीमुळे काँग्रेस नेतृत्वाची कोंडी झाली आहे. तसेच महत्त्वाकांक्षी नवज्योत सिंग सिद्धू यांच्या हातातूनही काही काळासाठी बाजी निसटल्याचे चित्र निर्माण झाले आहे. (Captain Amarinder Singh's bet decision raises tensions in Congress high command, prolongs decision on Navjot Singh Sidhu)
पंजाब काँग्रेसचे प्रदेशाध्यक्षपद नवज्योत सिंग सिद्धू यांच्याकडे सोपवण्याबाबत काँग्रेस नेतृत्वाकडून चाचपणी करण्यात येत होती. दरम्यान, पंजाबमधील काँग्रेसच्या अंतर्गत संघर्षात नवज्योत सिंग सिद्धूंच्या बाजूने पारडे झुकत असतानाच कॅप्टन अमरिंदर सिंग यांच्या गटाने विधानसभा निवडणुकीपूर्वी कुठल्याही हिंदू नेत्याकडे प्रदेशाध्यक्षपद सोपवण्याच्या चर्चेला हवा देऊन काँग्रेस हायकमांडसमोरील अडचणीत वाढ केली आहे. त्यामुळे सिद्धूबाबतचा निर्णय लांबणीवर पडला असून, या मुद्द्यावर अद्यापही विचारमंथन सुरू आहे.
कॅप्टन अमरिंदर सिंग आणि नवज्योत सिंग सिद्धू यांच्यात सुरू असलेल्या वर्चस्वाच्या जुगलबंदीत सिद्धूंनी एक डाव खेळल्यानंतर कॅप्टनजी दुसरा डाव खेळत आहेत. काँग्रेस नेतृत्व सिद्धूंना पक्षात मोठी भूमिका देण्याची तयारी करत असताना दुसरीकडे अमरिंदर सिंग त्यासाठी फार उत्सुक नाही आहेत. त्यामुळेच नवज्योत सिंग सिद्धू यांना पंजाब काँग्रेसचे प्रदेशाध्यक्ष बनवण्याची चर्चा सुरू झाल्यानंतर कॅप्टनजींच्या गटाने हिंदू प्रदेशाध्यक्ष बनवण्याची पुडी सोडली आहे. त्यासाठी राहुल गांधींचे निकटवर्तीय विजय इंदर सिंगला आणि माजी केंद्रीय मंत्री मनीष तिवारी यांची नावे पुढे करण्यात आली आहेत. हे हिंदू चेहरे पुढील निवडणुकीत हिंदू मतदारांना काँग्रेसकडे वळवण्यात यशस्वी ठरतील असा तर्क देण्यात येत आहे.
सिंगला हे राहुल गांधींचे निकटवर्तीय असल्याने कॅप्टन यांच्या गटाने त्यांचे नाव पुढे करून सिद्धू यांना रोखण्याची रणनीती आखली आहे. तसेच काँग्रेस नेतृत्व सिद्धूंना उपमुख्यमंत्री बनवून प्रचार समितीचे अध्यक्षपद देऊ इच्छित होते. मात्र सिद्धू हे त्यासाठी तयार नाहीत. दरम्यान, निर्णय घेण्यास होत असलेला उशीर आणि कॅप्टन अमरिंदर सिंग यांच्या नव्या खेळीमुळे वैतागलेल्या सिद्धू यांनी पंजाबमधील विजेच्या संकटावरून मुख्यमंत्र्यांवर ट्विट करत टीका केली आहे.