पिंपरी : दहशत माजविण्याच्या इरद्याने आठ जणांच्या टोळक्याने सुंदरबाग कॉलनी, दापोडी येथे दोन कार, टेम्पो, दुचाकीच्या काचा दगडाने व पेव्हिंग ब्लॉकने फोडल्या. तसेच तेथे आलेल्या दोन जणांना मारहाण करत “आम्ही येथील भाई आहोत, पोलिसांत तक्रार कराल तर याद राखा”, अशी धमकी दिली. शनिवारी रात्री ११च्या सुमारास हा प्रकार घडला.
या तथाकथित भाईंवर पोलिसांनी कारवाई करत चार जणांना अटक केली आहे. याप्रकरणी संदीप विनायक बागुल (वय, ४८, सुदंरबाग कॉलनी, दापोडी) यांनी फिर्याद दिली आहे. अटक केलेल्या आरोपींची नावे शेखर सुदाम भालेराव (वय २०, रा. दापोडी) अंकित सुदाम भालेराव (वय २१, दापोडी), सुमित भीम सूर्यवंशी (वय १९, रा. फुलेनगर, दापोडी), रोनित मोरे (वय १९, दापोडी) अशी आहेत. तर, रोहित सरोदे (वय २०, दापोडी), आदित्य कांबळे (वय २१), अजय जाधव (वय २०) रोहित मनतोडे हे आरोपी फरार आहेत.
पोलिसांनी दिलेल्या माहितीनुसार, आरोपींनी दहशत माजविण्यासाठी सुंदरबाग कॉलनीतील सार्वजनिक रोडवर मोठमोठ्या आवाजात आरडाओरडा करत दोन कार, एक टेम्पो आणि एका दुचाकीची दगड आणि पेव्हिंग ब्लॉकद्वारे फोडल्या. यावेळी फिर्यादी आणि त्याचा भाऊ पराग बागूल यांनी त्यांना अडवण्याचा प्रयत्न केला असता आरोपी शेखर भालेराव, अंकित भालेराव व सुमित सूर्यवंशी यांनी फिर्यादी आणि पराग बागुल यांना मारहाण करत त्यांच्या जवळील १,२०० रुपये काढून घेत “आम्ही इथले भाई आहोत. तुम्ही आमचे काय वाकडे करणार? तुम्ही जर पोलिसांत तक्रार केली तर तुम्हाला सोडणारी नाही.” अशी धमकी दिली.