पिंपरी : दुचाकीचा हॉर्न वाजवला म्हणून चार जणांनी मिळून दोघांना बेदम मारहाण केली. तसेच दुचाकीची हेडलाईट फोडून नुकसान केले. सावकार चौक, मोरे वस्ती, चिखली येथे गुरुवारी (दि. १४) रात्री साडेआठच्या सुमारास ही घटना घडली.
अजय भरत जाधव (वय २४, रा. मोरेवस्ती, चिखली) याला पोलिसांनी अटक केली आहे. त्याच्यासह तुषार शिंदे उर्फ बारक्या, पपड्या आणि धम्मपाल उर्फ ढम्या यांच्या विरोधात पोलिसांनी गुन्हा दाखल केला. लखन उर्फ लक्ष्मण बसवराज गाडेकर (वय २४, रा. त्रिवेणीनगर, तळवडे) यांनी या प्रकरणी शुक्रवारी (दि. १५) चिखली पोलीस ठाण्यात फिर्याद दिली.
पोलिसांनी दिलेल्या माहितीनुसार, फिर्यादी हे त्यांचा मित्र रुपेश प्रमोद ठाकूर यांच्या दुचाकीवरून जात होते. त्यावेळी सावकार चौक येथे आल्यावर तेथे रस्त्यावर गर्दी होती. त्यामुळे रुपेशने गाडीचा हॉर्न वाजवला. तू हाॅर्न का वाजवतो, असे आरोपी म्हणाले. आम्हाला जायचय रस्ता सोड, असे फिर्यादी म्हणाले. त्याचा राग आल्याने आरोपींनी वाद घातला. तसेच फिर्यादी व त्यांचा मित्र रुपेश ठाकूर यांना शिवीगाळ करून लाथाबुक्क्यांनी मारहाण केली.
फिर्यादीच्या डोक्यात दगड मारल्याने फिर्यादी जखमी झाले. पुन्हा या रस्त्यावर दिसला तर याद राखा, अशी धमकी देखील आरोपींनी दिली. तसेच रुपेश यांच्या गाडीची हेडलाईट फोडून नुकसान केले, असे फिर्यादीत नमूद आहे. पोलीस हवालदार पी. एस. परब तपास करीत आहेत.