पिंपरी : महिलेच्या विनयभंगप्रकरणी चिखली पोलिसांनी एका स्कूलबसचालकाला अटक केली आहे.
मधुकर रत्नाकर ढोले (रा. नेवाळे वस्ती, चिखली) असे आरोपीचे नाव आहे. याप्रकरणी २१ वर्षीय महिलेने फिर्याद दिली आहे. पोलिसांनी दिलेली माहिती अशी, शनिवारी सकाळी साडेदहाच्या सुमारास चिखलीतील मोरेवस्ती येथून फिर्यादी महिला व त्यांचे पती दुचाकीवरुन जात होते. त्यावेळी स्कूल बसचा (क्रमांक एमएच-१२, एयु ७४९८) चालक ढोले याने फिर्यादी महिलेच्या पतीला त्यांची दुचाकी बाजूला घेण्यासाठी हॉर्न दिला. मात्र, दुचाकी कडेला घेता येत नसल्याचे महिलेच्या पतीने ढोले याला सांगितले. त्यानंतर ढोले याने बसमधून उतरुन महिलेच्या पतीला शिवीगाळ करण्यासह मारहाण करुन लागला. फिर्यादी महिलेने ही भांडणे सोडविण्याचा प्रयत्न केला असता ढोले याने त्यांच्या हाताची बोटे पिरगळली. तसेच अश्लील भाषेत शिवीगाळ करुन ढकलून दिले. चिखली पोलीस तपास करीत आहेत.