पिंपरी : बनावट पोलिस पडताळणी प्रमाणपत्र देणाऱ्या टोळीचा पिंपरी-चिंचवड दहशतवाद विरोधी शाखेने पर्दाफाश केला आहे. दोन एजंट आणि त्याच्या साथीदारांवर याप्रकरणी दिघी पोलिस ठाण्यात गुन्हा दाखल केला. ही टोळी कंपन्यांमध्ये काम करणाऱ्या कामगारांकडून मिळतील तेवढे पैसे घेऊन त्यांना बनावट पोलिस पडताळणी प्रमाणपत्र पाठवत असे. मोबाईल फोनवरून हा गोरखधंदा सुरू होता.पिंपरी-चिंचवड दहशतवाद विरोधी शाखेचे (एटीबी) पोलिस शहरातील लष्करी, सरकारी तसेच महत्त्वाच्या खासगी आस्थापनांमध्ये काम करणाऱ्या खासगी व्यक्तींची माहिती जमा करीत आहेत. दिघी येथील टीसीएल कंपनीमध्ये काम करणाऱ्या वाहन चालक, हाऊस किपींग स्टाफ, सुरक्षा रक्षक आणि इतर कर्मचाऱ्यांची पोलिस पडताळणी प्रमाणपत्रांची तपासणी करीत होते. त्यावेळी त्यातील काही कामगारांकडे बनावट पीसीसी (पोलिस क्लिअरन्स सर्टिफिकेट) असल्याचे आढळून आले.एटीबीने त्या कर्मचाऱ्यांकडे चौकशी केली असता त्यांनी दोन एजंटना १२०० ते १६०० रुपये देऊन हे प्रमाणपत्र घेतल्याचे आढळले. यात ४१ पोलिस पडताळणी प्रमाणपत्र बनावट असल्याचे आढळून आले. हे प्रमाणपत्र बनावट असल्याची कल्पना संबंधित कामगारांना नव्हती. सहकारी मित्रांकडून मिळालेल्या माहितीनुसार कंपन्यांमधील कामगार संशयितांच्या मोबाईलवर संपर्क करत. त्यांना आवश्यक कागदपत्रे मोबाईलवर पाठवली जात. त्यानंतर १५ दिवसात संबंधित कामगाराच्या मोबाईलवर पोलिस पडताळणी प्रमाणपत्र येत असे. तसेच काही व्यक्तींना येरवडा व चतु:श्रृंगी पोलिस ठाणे येथून साधर्म्य असलेल्या पत्यांवरून बनावट प्रमाणपत्र दिल्याचे समोर आले. याबाबत एजंट संदीप बनसोडे (रा. येरवडा, पुणे), सुनील रोकडे (रा. पिंपळे गुरव) आणि त्यांना मदत करणाऱ्या इतरांच्या विरोधात गुन्हा दाखल केला. संशयितांनी २०२१ ते नोव्हेंबर २०२४ या कालावधीत हा गोरखधंदा केला.पोलिस आयुक्त विनयकुमार चौबे, सह आयुक्त शशिकांत महावरकर, अपर आयुक्त वसंत परदेशी, उपायुक्त डॉ. शिवाजी पवार यांच्या मार्गदर्शनाखाली पोलिस निरीक्षक विकास राऊत, उपनिरीक्षक शामवीर गायकवाड, पोलिस अंमलदार पुंडलिक पाटील, अरुण कुटे, सुरज मोरगावकर, तुषार कदम यांच्या पथकाने ही कामगिरी केली.
आपल्या आस्थापनेत काम करणाऱ्या कामगारांचे पोलिस पडताळणी प्रमाणपत्र खरे आहे का, याची खातरजमा करावी. संबंधित आस्थापना चालकांनी नजिकच्या पोलिस ठाणे, पोलिस आयुक्त कार्यालय अथवा दशतवाद विरोधी शाखेतून खातरजमा करून घ्यावी.- डॉ. शिवाजी पवार, पोलिस उपायुक्त