पिंपरी : तरुणाचे अपहरण करून त्याला मारहाण करणाऱ्या तसेच परिसरात दहशत निर्माण करणाऱ्या चार सराईत गुन्हेगारांना वाकड पोलिसांनी जेरबंद केले. या सराईतांची वाकड पोलीसांनी परिसरातून बुधवारी धिंड काढली.
वाकड पोलिसांनी दिलेल्या माहितीुनसार, अरविंद गौरव साठे (वय २०), सुरज पंडित पवार (वय २१), राहुल उर्फे बुग्या हिरामण लष्करे (वय १९), विशाल शहाजी कसबे (वय २३) अशी धिंड काढलेल्या आरोपींची नावे आहेत. मागील काही वर्षांपासून आरोपी वाकड परिसरात दहशत निर्माण करत होते. पोलिसांनी आरोपी कसबे याला तडीपार केले होते. तरी देखील तो परिसरात येऊन त्याच्या साथीदारांसह दहशत निर्माण करत होता. रविवारी मल्हारी मोतीराम लोंढे (वय २८, रा. काळाखडक झोपडपट्टी, वाकड) हा तरुण त्याच्या घरासमोर उभा असताना दहा ते बाराजण तेथे आले. त्यांनी मल्हारी यांना दमदाटी करून काळा खडक येथील पाण्याच्या टाकीजवळ नेले. तेथे असलेल्या आरोपी शाहरूख खान याने फिर्यादीच्या कानाखाली मारली. जागा भाड्याने देत नाही म्हणून मारहाण देखील केली. तसेच लाथाबुक्क्यांनी मारहाण करून आरोपींनी फिर्यादी मल्हारी यांना जखमी केले. याप्रकरणी बाळू भोसले, शाहरुख खान, अरविंद साठे, आकाश (पूर्ण नाव पत्ता माहिती नाही), राहुल पवार, सुरज पवार, बुग्या लष्करे, सोमा लोखंडे तसेच इतर चार ते पाच जणांवर गुन्हा दाखल केला आहे.