आता मोबाइल चोऱ्या रोखण्यासाठी पथक

पिंपरी-चिंचवड शहरामध्ये रस्त्याने मोबाइल फोनवर बोलत चालणाऱ्या व्यक्तीचे पाठीमागून मोटार सायकलीवरून येऊन मोबाइल हिसकावून नेण्याचे प्रमाण वाढले. यासाठी युनिट चारने पथक तयार

चिंचवड : पिंपरी-चिंचवड शहरामध्ये रस्त्याने मोबाइल फोनवर बोलत चालणाऱ्या व्यक्तीचे पाठीमागून मोटार सायकलीवरून येऊन मोबाइल हिसकावून नेण्याचे प्रमाण वाढले. यासाठी युनिट चारने पथक तयार केले. अनेक दिवसांपासून हे पथक आरोपींच्या शोधावर होते.
सहायक पोलीस निरीक्षक गणेश पाटील यांनी विश्वसनीय बातमीदारामार्फत मिळालेल्या माहितीनुसार, मोदीन महंमद शेख ( वय १९, रा. चिंचवडेनगर), आफताब अल्ताफ पिरजादे ( वय २०, रा. बिजलीनगर) यांना चौकशीसाठी ताब्यात घेतले. त्यांनी मोबाइल चोरी व जबरी चोरीचे गुन्हे केले असल्याचे निष्पन्न झाल्याने त्यांना अटक केली आहे. त्यांच्याकडून तपासामध्ये ४० हजार रुपये किमतीचे विविध कंपन्यांचे चार मोबाइल जप्त करण्यात आले. जप्त केलेल्या मालाबाबत निगडी पोलीस ठाण्यात दोन गुन्हे दाखल असल्याचे उघडकीस आले आहे. शेख व पिरजादे हे दोन्ही आरोपी निगडी पोलीस ठाण्यातील रेकॉर्डवरील गुन्हेगार असून, मोबाइल चोरी व जबरी चोरीचे गुन्हे दाखल आहेत. एक महिन्यापूर्वी या दोघांना गुन्हे शाखेच्या युनिट चारकडून अटक करण्यात आली होती. त्या वेळी त्यांच्याकडून मोटार सायकल, दोन महागडे
मोबाइल असा ७६ हजार रुपये किमतीचा माल जप्त करण्यात आला होता. (वार्ताहर)