पाच लाखांचे केले पन्नास लाख

जगद्गुरू संतश्रेष्ठ तुकोबारायांचे अभंग दृक्श्राव्य करण्यासाठी पाच लाख दाखवून ५० लाख लाटण्याचा प्रकार ‘लोकमत’ने उघडकीस आणला. त्यामुळे जनता संपर्क विभागात या प्रस्तावाची शोधाशोध सुरू झाली आहे

पिंपरी : जगद्गुरू संतश्रेष्ठ तुकोबारायांचे अभंग दृक्श्राव्य करण्यासाठी पाच लाख दाखवून ५० लाख लाटण्याचा प्रकार ‘लोकमत’ने उघडकीस आणला. त्यामुळे जनता संपर्क विभागात या प्रस्तावाची शोधाशोध सुरू झाली आहे. आता स्थायी समितीपुढे हा विषय महापौर शकुंतला धराडे यांनीच दिला असल्याची माहिती पुढे आली आहे. मात्र, ५० लाखांच्या विषयाबाबत मला माहिती नाही, असे महापौरांनी सांगितले. त्यामुळे या विषयामागील गौडबंगाल काय, असा प्रश्न उपस्थित होत आहे.
आषाढी वारीच्या निमित्ताने तुकोबारायांची अभंगगाथा दृक्श्राव्य पद्धतीने सोशल मीडिया, तसेच डिजिटल मीडियाच्या माध्यमातून सर्वत्र पोहोचविण्यासाठी निगडीतील शब्द क्रिएशन या संस्थेतर्फे स्थायी समितीला विषय दिला होता. हा भारतातील पहिलाच प्रयोग असल्याचे भासविले होते. वास्तविक संत तुकोबारायांचे अभंग दृक्श्राव्य करण्याचे काम आजवर अनेक संस्थांनी केले आहे. अभंगगाथा अनेक संकेतस्थळांवर मोफत उपलब्ध असताना हा विषय कोणतीही निविदाप्रक्रिया न करताच थेटपणे मंजूर केला होता. पाच लाख दाखवून ५० लाख रुपयांचा विषय मंजूर करवून घेतला होता. आकडेवारीत गोलमाल करून ४५८६ अभंगांसाठी १११० रुपये असे एकूण ५० लाख ९० हजार ४६० रुपये मंजूर करवून घेतले होते. त्यात ध्वनिमुद्रण स्टुडिओ, ध्वनिसंपादन, कलावंतांचा आवाज, व्हीडीओ संपादन आणि प्रूफ रीडरसाठी लाखोंची उधळपट्टी होणार असल्याचे लोकमतने उघडकीस आणले होते. तसेच हा विषय माहिती आणि जनता संपर्क विभागाकडील इतर लेखाशीर्षातून करण्यासही मान्यता देण्यात आली होती. विषयाची कोणतीही शहानिशा न करता समितीने या विषयास मंजुरी दिली कशी, असा प्रश्न उपस्थित होतो.