पिंपरी : चारजणांनी तरुणाचे अपहरण केले. त्यानंतर मारहाण करून अपहरणकर्त्यांनीच तरुणाला पोलिस ठाण्यात आणले. पोलिसांनी अपहरणकर्त्यांना अटक केली. पिंपरी येथे रविवारी (दि. ९) दुपारी दीडच्या सुमारास ही घटना घडली.
सागर सुरेशकुमार यादव (वय २४) असे अपहरण आणि सुटका झालेल्या तरुणाचे नाव आहे. सुरेशकुमार यादव यांनी याप्रकरणी पिंपरी पोलिस ठाण्यात फिर्याद दिली. योगेश राजेंद्र जगताप (वय ३९, रा. पिंपरी), राहुल तुकाराम जगताप (वय ५०, रा. चिंचवड), अमित तुकाराम जगताप (वय ४८, रा. चिंचवड), विजय चंद्रकांत माने (वय ३९, रा. पिंपरी) यांना पोलिसांनी अटक केली.
पोलिसांनी दिलेल्या माहितीनुसार, फिर्यादीची पिंपरीगाव येथे वडापावची गाडी आहे. एका चारचाकी वाहनामधून आरोपी फिर्यादीच्या वडापावच्या गाडीजवळ आले. तेथे फिर्यादीचा मुलगा सागर याला मारहाण करून पिंपळे सौदागरच्या दिशेने घेऊन गेले. तेथे पुन्हा मारहाण करून आरोपींनी सागर याला पिंपरी पोलिस ठाण्यात घेऊन गेले, असे फिर्यादीत नमूद आहे. अपहरणकर्त्यांनीच अपहरण झालेल्या तरुणाला पोलिसांसमोर हजर केल्याने खळबळ उडाली. पिंपरी पोलिस तपास करीत आहेत.