अतिक्रमण कारवाईवरून अंथुर्णेत तणाव

येथील गायरान जमिनीवरील अतिक्रमण काढताना ग्रामपंचायत प्रशासन, पोलीस व ग्रामस्थांमध्ये मोठा वाद झाला. कारवाई सुरू असताना येथील महिलेने आत्मदहनाचा प्रयत्न केला

अंथुर्णे : येथील गायरान जमिनीवरील अतिक्रमण काढताना ग्रामपंचायत प्रशासन, पोलीस व ग्रामस्थांमध्ये मोठा वाद झाला. कारवाई सुरू असताना येथील महिलेने आत्मदहनाचा प्रयत्न केला. वेळीच महिला पोलिसांनी तिला ताब्यात घेतल्याने अनर्थ टळला; मात्र येथील माजी सरपंचाने या महिलेची खिल्ली उडवल्याने वातावरण आणखी तणावपूर्ण बनले. संपूर्ण गाव अतिक्रमणांमध्ये असताना, जाणीवपूर्वक आमच्यावरच कारवाई केली जात आहे, असा आरोपही या वेळी येथील ग्रामस्थांनी केला.
दरम्यान, रात्री उशिरा सरकारी कामात अडथळा आणल्याप्रकरणी पोलिसांनी ३२ जणांना ताब्यात घेतले. रविवारी (दि.१४) अतिक्रमण काढण्यासंदर्भात ग्रामपंचायतीने नोटीस बजावली होती. सकाळीच १० ते १२ ट्रॅक्टर, ५ जेसीबी मशिन व सुमारे ४० ते ५० पोलिसांच्या फौजफाट्यासह ग्रामपंचायत पदाधिकारी, तहसीलदार यांनी शिंदेमळा येथे अतिक्रमणविरोधी कारवाईला सुरुवात केली; मात्र याठिकाणच्या रहिवाशांनी ‘आम्ही गरीब माणसं, घर पाडलं तर कुठं जाणार’ असा सवाल केला; मात्र प्रशासनाने पोलीस बळाचा वापर करीत कारवाईला सुरुवात केली. या वेळी रहिवाशांनी आपापल्या घरांपुढील जनावरांचे गोठे, चारा पेटवून दिला. महिला व लहान मुलांसहित सर्वांनी घरांमध्ये कोंडून घेतले.
‘सगळं गाव अतिक्रमणांमध्ये असताना, कारवाई फक्त आमच्यावर का’ असा सवालही केला.
यानंतर ग्रामपंचायत सदस्य, पदाधिकारी व अतिक्रमणधारकांमध्ये मोठा वाद झाला.
या वेळी केशर वाघ (वय ३५) या महिलेने अंगावर रॉकेल ओतून आत्मदहनाचा प्रयत्न केला; मात्र महिला पोलिसांनी तिला वेळीच अडवल्याने अनर्थ टळला. तहसीलदारांसमोर हा प्रकार झाला असताना, तहसीलदारांनी ही कारवाई ग्रामपंचायतीची असल्याचे सांगत हात वर केले, तर येथील माजी सरपंच नाना पाटील यांनी या महिलेने अंगावर रॉकेल नाही, तर पाणी ओतून घेतल्याचे तहसीलदारांना सांगितले. यामुळे परिस्थिती चिघळली. तसेच, घरांचे दरवाजे उघडून रहिवाशांना बाहेर काढत असताना, येथील एका वृद्धेला हृदयविकाराचा झटका आला. पोलिसांच्या वाहनातून या वृद्धेस लासुर्णे येथील प्राथमिक आरोग्य केंद्रात हलवण्यात आले. मात्र, वृद्धेचे प्रकृती नाजूक असल्याने तिला पुढील उपचारासाठी बारामती येथे दाखल करण्याच्या सूचना येथील वैद्यकीय अधिकाऱ्यांनी केल्या; मात्र उपचारास पैसे नसल्याने या वृद्धेचे कुटुंबीय हतबल झाले.
वालचंदनगर-अंथुर्णे रस्त्यालगत शिंदेमळा येथे ७ हेक्टर ९८ आर क्षेत्र आहे. याठिकाणी काही रहिवाशांना ग्रामपंचयतीने घरकुल मंजूर केले आहे. सुमारे २५० कुटुंबे याठिकाणी राहतात. आर्थिक परिस्थीती बेताची असल्याने येथील बहुतेक कुटुंबांचा उदरनिर्वाह हा मजुरीवरच चालतो. सहा महिन्यांपूर्वी अंथुर्णे ग्रामपंचायतीच्या निवडणुका झाल्या. यानंतर शिंदेमळा येथील अतिक्रमांसंदर्भात ग्रामपंचायतीने इंदापूर न्यायालयात याचिका दाखल केली.
न्यायालयाने येथील अतिक्रमणे काढण्याचे निर्देश दिले; मात्र येथील रहिवाशांना यासंदर्भात महस३ल विभागाच्या नोटिसा आल्या नाहीत. केवळ ग्रामपंचायतीने त्याबाबतच्या तीन नोटिसा येथील रहिवाशांना पाठवल्या होत्या. या वेळी पोलिसांनी घेतलेल्या संयमी भूमिकेमुळे ग्रामस्थांनी पोलिसांचे कौतुक केले. (वार्ताहर)राजकीय आकसापोटी आमचा बळी : आमदारांच गाव असूनही अन्याय1‘आमदारांचे गाव असताना आमच्यावर अन्याय होतो. राजकीय आकसापोटी आम्हा गोरगरिबांचा बळी दिला जात आहे. बारामती-इंदापूर रस्त्याकडेने धनदांडग्यांच्या इमारती अतिक्रमणांमध्ये आहेत; मात्र त्यांच्यावर कारवाई होत नाही. आमदार दत्तात्रय भरणे यांच्या अधिपत्याखाली येथील ग्रामपंचायत आहे. ग्रामपंचायत पदाधिकारी असे बेताल वागत असताना, त्यांना आमदारांनी समज का दिली नाही,’ अशी चर्चाही येथे रंगली होती. 2‘गोरगरिबांवर अन्याय करता; कारवाई ग्रामपंचायतीची आहे, तर तहसीलदार येथे कशाला आलेत?’ अशा शब्दांत रहिवाशांनी तहसीलदारांना फैलावर घेतले. जवळपास हजाराच्यावर जमलेल्या ग्रामस्थांपुढे तहसलीदारांची भंबेरी उडाली आणि त्यांनी अतिक्रमण ठिकाणावरून निघून जाणे पसंत केले. यानंतर ग्रामपंचायत पदाधिकाऱ्यांनीदेखील येथून पळ काढला.