पिंपरी : अनोळखी व्यक्तींनी आपण पिंपरी-चिंचवड महापालिकेच्या पाणीपुरवठा विभागातून बोलत असल्याचे भासवून एका व्यावसायिकाचे पाण्याचे कनेक्शन कट करण्याची भीती घालण्यात आली. व्यावसायिकाला व्हाॅट्सॲपवर एक एपीके फाईल पाठवून त्याआधारे व्यावसायिकाच्या बँक खात्यातून दोन लाख ६५ हजार रुपये काढून घेत फसवणूक केली. ही घटना १६ ते १७ फेब्रुवारी या कालावधीत निगडी येथे घडली.
रतनलाल मुरलीधर शर्मा (७६, रा. यमुनानगर, निगडी) यांनी याप्रकरणी सायबर पोलिस ठाण्यात फिर्याद दिली. त्यानुसार दिवेश जोशी नावाने बोलणारा व्यक्ती आणि इतर अनोळखी व्यक्तींच्या विरोधात पोलिसांनी गुन्हा दाखल केला.
पोलिसांनी दिलेल्या माहितीनुसार, संशयितांनी फिर्यादी शर्मा यांना फोन करून चालू महिन्याचे पाण्याचे बिल अपडेट नसल्याने पिंपरी-चिंचवड महापालिकेच्या पाणीपुरवठा विभागाकडून पाण्याचे कनेक्शन कट करणार असल्याची भीती घातली. त्यानंतर तत्काळ अधिकारी दिवेश जोशी यांना संपर्क करण्यास सांगून संशयितांनी शर्मा यांना व्हाॅट्सॲपवर पाइपलाइन वॉटर अपडेट नावाने एपीके फाईल पाठवली. ती फाईल डाउनलोड करण्यास भाग पाडून शर्मा यांच्या बँक खात्याची माहिती घेत त्यांच्या खात्यावरून इतर खात्यावर दोन लाख ६५ हजार ५०९ रुपये काढून घेत फसवणूक केली.
महापालिका आयुक्तांच्या नावाने मेसेज
संशयितांनी पिंपरी-चिंचवड शहरातील अनेक लोकांना अशा पद्धतीने मेसेज पाठविले. या महापालिका आयुक्तांच्या नावानेही वेगवेगळ्या नंबरवरून मेसेज पाठविले. तसेच पीबी बिल अपडेट करण्यास सांगून एपीके फाईल डाउनलोड करण्यास सांगून काही लोकांची फसवणूक केल्याचेही प्रकार घडले आहेत.
नागरिकांनी सतर्क राहण्याचे आवाहन
नागरिकांनी अशा कोणत्याही बनावट मेसेजला प्रतिसाद देऊ नये. तसेच एपीके फाईल डाउनलोड करू नये. असा बनावट मेसेज आल्यास स्थानिक पोलिस ठाणे किंवा सायबर पोलिसांशी संपर्क साधण्याचे आवाहन पोलिसांनी केले आहे.