पिंपरी : राहत्या घरात गळफास घेऊन अभियंता तरुणाने आत्महत्या केली. माळीनगर, देहूगाव येथे बुधवारी (दि. ६) सायंकाळी साडेसातच्या सुमारास ही घटना डघडकीस आली.
नितीन चंद्रभान परदेशी (२४), असे आत्महत्या केलेल्या इंजिनियर तरुणाचे नाव आहे. त्यांचा भाऊ कैलास चंद्रभान परदेशी (२७, रा. माळीनगर, देहूगाव, मूळ रा. वैजापूर, जि. संभाजीनगर), यांनी याप्रकरणी देहूरोड पोलिसांना माहिती दिली.
पोलिसांनी दिलेल्या माहितीनुसार, कैलास परदेशी हा एका खासगी कंपनीत इंजिनियर आहे. तो त्याच्या परिवारासह माळीनगर, देहूगाव येथे राहण्यास आहे. त्यांच्यासोबत त्यांचा भाऊ नितीन परदेशी हा देखील राहण्यास आला होता. इंजिनियर असलेला नितीन हा एका खासगी कंपनीत नोकरीला होता.
रक्षाबंधननिमित्त कैलास यांची पत्नी आणि मुले गावी गेले. दिवसपाळी असल्याने कैलास हे बुधवारी कामावर गेले. रात्रपाळी असल्याने नितीन हा घरी एकटाच होता. त्यावेळी त्याने घरात गळफास घेतला. कैलास हे कामावरून सायंकाळी घरी आले असता हा प्रकार त्यांच्या निदर्शनास आला. पिंपरी येथील वायसीएम रुग्णालयात शवविच्छेदन करून मृतदेह नातेवाईकांच्या ताब्यात देण्यात आला.