पिंपरी : पत्नी आंघोळ करीत असताना पतीने तिचा व्हिडीओ काढल्याचा संतापजनक प्रकार समोर आला आहे. याप्रकरणी महिलेच्या पतीला पोलिसांनीअटक केली आहे. देहूरोड परिसरात २१ मे २०२१ रोजी ही घटना उघडकीस आली.
पीडित महिलेने याप्रकरणी देहूरोड पोलीस ठाण्यात शुक्रवारी (दि. १८) फिर्याद दिली आहे. त्यानुसार पोलिसांनी ४० वर्षीय आरोपीच्या विरोधात गुन्हा दाखल केला आहे. पोलिसांनी दिलेल्या माहितीनुसार, आरोपी हा फिर्यादीचा पती आहे. त्यांच्या दोन मुलींसह ते देहूरोड परिसरात वास्तव्यास आहेत. आरोपी हा फिर्यादीवर संशय घेत गेल्या चार ते पाच वर्षांपासून आरोपी हा फिर्यादी पत्नीला अशा पद्धतीने त्रास देत आहे. दोन्ही मुली तसेच पती घरात असताना फिर्यादी पत्नी त्यांच्या घरातील मोरीत आंघोळ करीत होती. त्यावेळी आरोपी पतीने तिच्या नकळत तिचा व्हिडीओ काढला. हा प्रकार फिर्यादीच्या निदर्शनास आला. त्यामुळे त्यांनी याबाबत विचारणा केली. मात्र आरोपी पती तिला बधला नाही. त्यामुळे फिर्यादीने देहूरोड पोलिसांकडे धाव घेतली. पोलिसांनी त्याला ताब्यात घेतले. चौकशी दरम्यान आरोपीने पोलिसांनाही उडवाउडवीची उत्तरे दिली. मात्र पोलिसांनी खाक्या दाखविताच त्याने व्हिडीओ काढल्याचे कबूल केले. पोलिसांनी त्याचा मोबाइल तपासला असता त्यात व्हिडीओ आढळून आला. त्यानुसार त्याच्या विरोधात गुन्हा दाखल करून अटक करण्यात आली. त्यानंतर आरोपीला मावळ तालुक्यातील वडगाव न्यायालयात हजर केले असता त्याची जामिनावर सुटका करण्यात आली. सहायक पोलीस निरीक्षक कुंदा गावडे-डिसोजा तपास करीत आहेत.