पिंपरी : जुन्या भांडणाच्या कारणावरून सहा जणांच्या टोळक्याने एका तरुणावर कोयत्याने वार केले. तसेच तरुणाला मारहाण करून परिसरात दहशत निर्माण केली. ही घटना बुधवारी (दि. ८) सायंकाळी साडेचार वाजता काजळेवाडी, चऱ्होली बुद्रूक येथे घडली.
सौरभ विजय गायकवाड, आदित्य अशोक चोरगडे, मोन्या गायकवाड, सुयश यादव व इतर दोघांच्या विरोधात गुन्हा दाखल करण्यात आला आहे. याप्रकरणी मनीषकुमार मिथिलेश मिश्रा (२४, रा. चऱ्होली, ता. हवेली) यांनी दिघी पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपींचा ३ मे रोजी फिर्यादी सोबत किरकोळ कारणावरून वाद झाला होता. त्या कारणावरून आरोपींनी आपसात संगनमत करून जमाव जमवला. आरोपींनी फिर्यादीला कोयत्याने वार करत मारहाण केली. शिवीगाळ करून आरडाओरडा करत परिसरात दहशत निर्माण केली. दिघी पोलिस तपास करीत आहेत.