ऑनलाइन लोकमत मुंबई, दि. 9 - गुगलनं डुडलच्या माध्यमातून फ्रान्समधील प्रसिद्ध नेत्रचिकित्सक फर्डिनॅन्ड मोनोयेर (Ferdinand Monoyer) यांना त्यांच्या 181 व्या वाढदिवसानिमित्त खास अंदाजात शुभेच्छा दिल्या आहेत. गुगलनं विशेष डुडल बनवून मोनोयेर यांना वाढदिवसाच्या शुभेच्छा देत मोनोयेर व त्यांच्या कार्याबाबतच्या माहितीला उजाळा देण्याचा प्रयत्न केला आला आहे. फर्डिनॅन्ड मोनोयेर यांचा जन्म 9 मे 1836 साली झाला होता व 1912 साली वयाच्या 76 व्या वर्षी निधन झाले होते. डोळ्यांची दृष्टी तपासण्यासाठीच्या युनिट डायओप्टरचे (यंत्र) ते जनक मानले जात. डायओप्टर या यंत्राद्वारे भिंगाच्या सहाय्याने डोळ्यांच्या दृष्टीची शक्ती तपासली जाते. जेव्हा एखादा रुग्ण डोळे तपासणीसाठी डॉक्टरांकडे जातात तेव्हा सुरुवातीला वेगवेगळे शब्द आणि आकार त्या रुग्णाला पाहण्यास सांगितले जाते. त्यानुसार डॉक्टर रुग्णाच्या डोळ्यांच्या दृष्टीची तपासणी केली जाते. या यंत्राला डायओप्टर असे म्हटले जाते. डोळे तपासणीसंबंधीचा हा चार्ट 100 वर्षांपूर्वी फर्डिनॅन्ड यांनी बनवला होता. या चार्टला मोनोयेर चार्ट या नावानंही ओळखले जाते. याच फर्डिनॅन्ड मोनोयेर यांचा 181 वा वाढदिवस गुगल आज (9 मे)डुडलच्या माध्यमातून साजरा करत आहे. गुगलनं आपल्या डुडलमध्ये "ओ" अक्षरांच्या जागी अॅनिमेटेड डोळे दाखवले आहेत. शेजारी मोनोयेर चार्टदेखील दिसत आहे. येथे डायोप्टरनुसार लहान अक्षरापासून ते मोठ्या आकारातील अक्षरांचा अॅनिमेटेड चार्टही येथे दाखवण्यात आला आहे. या डुडलवर क्लिक केल्यानंतर तुम्हाला मोनोयेर यांच्यासंबंधीची संपूर्ण माहिती उपलब्ध करुन देण्यात आली आहे. तुम्ही या चार्टचं योग्यपद्धतीनं निरीक्षण केले तर तुम्हाला तेथे फर्डिनॅन्ड मोनोयेर यांचे नावदेखील दिसेल. त्यांच्या वाढदिवसानिमित्त गुगलनं आजचे डुडल "व्हिजन क्लॅरिटी" संदर्भात बनवले आहे. जाणून घ्या डोळ्यांसंबंधीच्या काही महत्त्वपूर्ण गोष्टी 1. मानवी डोळ्यांचे वजन साधारणतः 28 ग्रॅम व रुंदी 2.5 से.मी. असते. 2. मनुष्याच्या जन्मावेळी डोळ्यांची वाढ क्वचित प्रमाणातच होते 3. मानवी डोळे फक्त लाल, निळा आणि हिरवा हे तीनच रंग प्रत्यक्ष पाहातात. या रंगांच्या कमीअधिक संवेदनांचे एकत्रिकरण करुन मेंदू अनेक रंग पाहू शकतो. 4. मानवी डोळे राखाडी रंगाच्या सुमारे 50,000 छटा पाहू शकतात 5. सामान्यातः दर मिनिटाला 12 ते 17 वेळा पापण्यांची उघडझाप होते 6. डोळ्याला झालेली एखादी किरकोळ जखम किंवा ओरखडा बरे होण्यासाठी 48 तास लागतात 7. डोळ्याच्या मज्जापटलावर जवळपास 137 नळ्या ( Rod ) आणि शंकूच्या (Cone) आकाराच्या चेतापेशी असतात. या दोघांच्या कामात थोडासा फरक आहे. शंकूच्या आकाराच्या चेतापेशी वस्तूबद्दल बारीक तपशील टिपतात. तर नळीच्या आकाराच्या पेशी तपशील टिपण्यात कमी पडल्या तरी त्या रात्रीच्या वेळी शंकूपेशींपेक्षा अधिक चांगले काम करतात. शंकूपेशी रंगांची संवेदना ग्रहण करतात. या शंकूपेशींना काही काळ सतत वापरले तर त्या दमतात आणि पुढे त्याच रंगाची संवेदना नीट ग्रहण करू शकत नाहीत. त्यामुळेच प्रतिमेच्या रंगात फरक पडतो. 8. डोळ्यांनां नियंत्रित ठेवणारे स्नायू शरीरातील सर्वाधिक सक्रीय स्नायू असतात 9. आपल्या सरळ दिसणार प्रतिमा डोळ्यांना अगदी विरुद्ध म्हणजे उलट स्वरुपात दिसते 10. डोळ्यांच्या आतदेखील स्नायू असतात. आपले डोळे वेगवेगळ्या दिशांकडे फिरवण्याचे कार्य हे डोळ्याच्या बाहेरचे स्नायू करतात