इराणचा समुद्र किनारा अचानक रक्तासारखा लाल का झाला? पाहा निसर्गाचा धडकी भरवणारा चमत्कार

1 / 8

मुसळधार पावसानंतर या बेटाचा समुद्रकिनारा चक्क 'रक्तासारखा' लाल झाला असून, हे विलोभनीय दृश्य पाहून जणू पृथ्वीवरच मंगळ ग्रह अवतरला की काय, असा भास पर्यटकांना होत आहे. हा चमत्कार पाहून वैज्ञानिकही चकित झाले असून या लाल रंगामागचे गुपित आता समोर आले आहे.

2 / 8

होर्मुज बेट हे फारसच्या आखाताजवळ स्थित असून ते आपल्या रंगीबेरंगी भू-प्रकृतीसाठी जगभर प्रसिद्ध आहे. या बेटावरील माती आणि खडक 'लोह ऑक्साईड'ने समृद्ध आहेत. विशेषतः येथे 'हिमेटाइट' नावाचे खनिज मोठ्या प्रमाणात आढळते.

3 / 8

विज्ञानाच्या भाषेत सांगायचे तर, हिमेटाइट (Fe2O3) हे नैसर्गिक लोह ऑक्साईड आहे, जे मातीला गडद लाल रंग देते. आश्चर्याची गोष्ट म्हणजे, मंगळ ग्रहाचा पृष्ठभाग लाल दिसण्यामागेही हेच खनिज कारणीभूत आहे.

4 / 8

जेव्हा या बेटावर मुसळधार पाऊस पडतो, तेव्हा पावसाचे पाणी लोहयुक्त डोंगर आणि मातीतून वाहते. या प्रवाहात हिमेटाइटचे कण मिसळतात आणि ते थेट समुद्रात जाऊन मिळतात. यामुळे काही काळासाठी संपूर्ण समुद्रकिनारा आणि लाटा रक्तासारख्या गडद लाल रंगाच्या दिसू लागतात.

5 / 8

समुद्राचा रंग अचानक लाल झाल्याने सुरुवातीला स्थानिकांमध्ये भीतीचे वातावरण होते. मात्र, पर्यावरण तज्ज्ञांनी स्पष्ट केले आहे की, हा बदल पूर्णपणे नैसर्गिक असून तो सागरी पर्यावरणासाठी हानिकारक नाही. हे केवळ एक हंगामी स्थित्यंतर आहे.

6 / 8

मात्र, पावसाच्या पाण्यामुळे होणारी जमिनीची धूप बेटाच्या नैसर्गिक रचनेत बदल करू शकते, असा इशाराही तज्ज्ञांनी दिला आहे. त्यामुळे या निसर्गसौंदर्याचे जतन करण्यासाठी आता विशेष लक्ष दिले जात आहे.

7 / 8

होर्मुज बेटाची माती केवळ पर्यटनासाठीच नव्हे, तर स्थानिक अर्थव्यवस्थेसाठीही महत्त्वाची आहे. येथील मातीमध्ये जिप्सम, लोह खनिज आणि विविध नैसर्गिक रंग आढळतात. स्थानिक लोक या खनिजांचा वापर पारंपारिक रंग बनवण्यासाठी करतात.

8 / 8

हा नैसर्गिक चमत्कार केवळ डोळ्यांचे पारणे फेडणारा नसून, तो पृथ्वीच्या पृष्ठभागावर होणाऱ्या भूगर्भीय प्रक्रियांची खोलवर समज देतो. निसर्ग आणि हवामान एकत्र मिळून पृथ्वीला कशा प्रकारे अनोख्या रंगांनी सजवू शकतात, याचे हे जिवंत उदाहरण ठरले आहे.