महिलांसाठी जबरदस्त संधी! 'या' स्कीम अंतर्गत विना गॅरंटी मिळणार १० लाखांपर्यंतचं लोन; व्यवसाय सुरू करणं होणार सोपं

1 / 7

आजच्या काळात महिला केवळ घरच सांभाळत नाहीत, तर व्यवसायाच्या जगातही आपली नवी ओळख निर्माण करताना दिसत आहेत. केंद्र सरकारची प्रधानमंत्री मुद्रा योजना (PMMY) महिलांच्या याच जिद्दीला नवी भरारी देण्याचं काम करत आहे.

2 / 7

जर तुम्हालाही स्वतःचा छोटा स्टार्टअप, ब्युटी पार्लर, बुटीक किंवा कोणताही लघुउद्योग सुरू करायचा असेल, तर ही बातमी तुमच्यासाठी अत्यंत महत्त्वाची आहे. या योजनेअंतर्गत महिला कोणत्याही गॅरंटीशिवाय १० लाख रुपयांपर्यंतचं कर्ज मिळवू शकतात.

3 / 7

प्रधानमंत्री मुद्रा योजनेचा मुख्य उद्देश स्वयंरोजगाराला प्रोत्साहन देणं हा आहे. या योजनेचं सर्वात मोठे वैशिष्ट्य म्हणजे कर्ज घेण्यासाठी तुम्हाला कोणतीही जमीन किंवा सोनं गहाण ठेवण्याची गरज नसते. महिलांना उद्योजक बनवण्यासाठी सरकारनं या योजनेचं तीन श्रेणींमध्ये विभाजन केलंय.

4 / 7

पहिली श्रेणी 'शिशू कर्ज' असून यात नवीन व्यवसायासाठी ५०,००० रुपयांपर्यंतचं कर्ज दिलं जातं. दुसरी श्रेणी 'किशोर कर्ज' आहे, ज्यामध्ये व्यवसायाला गती देण्यासाठी ५०,००० ते ५ लाख रुपयांपर्यंतचे कर्ज मिळतं. तिसरी श्रेणी 'तरुण कर्ज' असून यात व्यवसायाच्या विस्तारासाठी ५ लाख ते १० लाख रुपयांपर्यंतचे कर्ज उपलब्ध करून दिलं जातं.

5 / 7

मुद्रा योजनेत महिला अर्जदारांना विशेष प्राधान्य दिले जाते. अनेक बँका आणि वित्तीय संस्था महिला उद्योजकांना व्याजदरात ०.२५% ते ०.५०% पर्यंत विशेष सवलत देखील प्रदान करतात. याशिवाय, कर्जाची प्रक्रिया अत्यंत सोपी ठेवण्यात आली आहे.

6 / 7

सोप्या प्रक्रियेमुळे ग्रामीण आणि शहरी अशा दोन्ही भागांतील महिलांना याचा लाभ घेता येईल. महिला आपल्या आवडीनुसार टेलरिंग, बुटीक शॉप, ब्युटी पार्लर, टिफिन सर्व्हिस, लोणचं-पापड व्यवसाय, हस्तशिल्प, कुटीर उद्योग, किराणा दुकान किंवा कोणत्याही छोट्या मॅन्युफॅक्चरिंग युनिटसाठी या कर्जाचा लाभ घेऊ शकतात.

7 / 7

मुद्रा कर्जासाठी तुम्ही तुमच्या जवळच्या सरकारी किंवा खासगी बँक, ग्रामीण बँक किंवा बिगर बँकिंग वित्तीय कंपनीमध्ये (NBFC) जाऊन अर्ज करू शकता. अर्जासाठी आधार कार्ड, पॅन कार्ड, निवासाचा दाखला, पासपोर्ट साईज फोटो आणि तुमच्या व्यवसायाचा प्रोजेक्ट रिपोर्ट असणं आवश्यक आहे. सध्याच्या काळात 'उद्यमी मित्र' पोर्टलच्या माध्यमातून ऑनलाइन अर्ज करण्याची सुविधाही उपलब्ध आहे, जिथे तुम्ही घरबसल्या स्वतःची पात्रता तपासून कर्जासाठी अर्ज करू शकता.