परभणी : थकबाकी न भरल्याने वीजपुरवठा कायमस्वरूपी खंडित केलेला असतानाही चोरून वीज वापरणाऱ्या चार ग्राहकांवर विद्युत कायद्यान्वये कारवाई करत गुन्हे दाखल करण्यात आले आहेत. सांघिक कार्यालयाच्या पथकाची धडक कारवाईत ही बाब निदर्शनास आली असून अधिकृतपणेच वीज वापरण्याचे आवाहन महावितरणने केले आहे.
जिंतूर शहरातील कायमस्वरूपी वीजपुरवठा खंडित (पीडी) केलेल्या ग्राहकांची तपासणी केली असता, त्या ग्राहकांद्वारे अनधिकृतपणे वीज वापर केला असल्याचे पथकाच्या निदर्शनास आले. याबाबत जिंतूरचे उपकार्यकारी अभियंता आर. आर. मेश्राम आणि शहर शाखेचे सहायक अभियंता ए. डब्लू. कामडी यांच्या पथकाने १६ फेब्रुवारी रोजी बामणी प्लॉटवरील अल्पसंख्याक मुलींच्या वसतिगृहासमोरील भागात असणाऱ्या अनधिकृतपणे वीज वापर करणाऱ्या ग्राहकांची तपासणी केली. यामध्ये चार ग्राहकांचे वीज मीटर बिल थकबाकी असल्याने कायमस्वरूपी बंद करण्यात आले होते.
मीटर व वायर काढून आणल्यानंतर या ग्राहकांद्वारे आकडा टाकून अनधिकृतपणे वीज वापर केला जात होता. या ठिकाणचे घटनास्थळ पंचनामा करून वीज कायदा २००३ च्यानुसार ४ जणांवर एकूण १,१३३ युनिटची वीज चोरी केल्याबद्दल गुन्हा नोंद करण्यात आला आहे.
प्रत्येकाला भरावे लागणार २६ हजार ८३६ रुपयेया कारवाईत सय्यद फिरोज तब्बू यांना २५९ युनिटच्या वीज चोरीचे ४ हजार ३२३ एवढे वीज बिल दंड म्हणून आकारण्यात आले, तसेच ताहेर खान जाफर खान पठाण यांना ३३४ युनिटच्या वीज चोरीचे ५ हजार ४४६ एवढे वीज बिल दंड म्हणून देण्यात आले. अब्दुल रेहमान मोबीन यांना ३२४ युनिटच्या वीज चोरीचे ११४५ एवढे वीज बिल दंड म्हणून देण्यात आले. त्याचबरोबर अब्दुल वकील शेख सलीम यांना २१६ युनिटच्या वीज चोरीचे ३५८६ एवढे वीज बिल दंड म्हणून आणि प्रत्येकी २ हजार एवढे बिल तडजोड रक्कम म्हणून आकारण्यात आली. वीजचोरी केल्याबाबद्दल चारही वीज चोरांना एकूण १८ हजार ८३७ एवढ्या रक्कमेचे वीज चोरीचे बिल आणि ८ हजार एवढ्या रक्कमेचे तडजोडीचे बिल देण्यात आले आहे. कारवाई केलेल्या पथकात कार्यालयीन कर्मचारी सहायक अभियंता एस. डी. अडबे, निम्नस्तर लिपिक एस. ए. कवडे, वरिष्ठ तंत्रज्ञ अ. खालेक मो. सुलेमान, आर. आर. घनसावंत, एस. एन. पठाण यांचा समावेश होता.
ग्राहकांमध्ये खळबळवीज वितरण कंपनीकडून अनधिकृतपणे वीज वापरणाऱ्या जिंतूर शहरातील चार जणांविरुद्ध गुन्हा दाखल करण्यात आला. त्यामुळे शहरासह ग्रामीण भागातील वीज ग्राहकांमध्ये खळबळ उडाली आहे.