आम्हाला आता गोळ्या घाला अन् मग शक्तिपीठसाठी जमीन मोजा ! आंदोलन चिरडण्यासाठी पोलिसांनी मध्यरात्रीच केली धरपकड

आंदोलन चिरडण्यासाठी पोलिसांनी मध्यरात्रीच केली धरपकड; सहजपुरात संचारबंदीसदृश स्थिती

परभणी : आम्हाला गोळ्या घाला अन् जमीन मोजा, असा आक्रोश करणाऱ्या शेतकऱ्यांना जनावरांसारखे ओढून बाजूला करीत शक्तिपीठ महामार्गासाठी प्रशासनाने प्रचंड पोलिस फौजफाट्यासोबत जबरदस्तीने जमीन मोजणी सुरू केल्याचा प्रकार तालुक्यातील सहजपूर जवळा येथे घडला.

प्रशासनाकडून शक्तिपीठ महामार्गासाठी देण्यात आलेल्या नोटिसा शेतकऱ्यांनी स्वीकारण्यास नकार दिल्यानंतर शुक्रवारी मध्यरात्री कलम १६८ अन्वये नोटिसा घरांवर चिटकविण्यात आल्या. तसेच बीएनएस १६३ अंतर्गत निर्बंध लागू करून गटधारकांशिवाय इतरांना गावात प्रवेशबंदी करण्यात आली. त्यानंतर  जिल्ह्यातील ५०हून अधिक शेतकऱ्यांना मध्यरात्री ताब्यात घेऊन ताडकळस व दैठणा, पूर्णा, नानलपेठ पोलिस ठाण्यात हलविण्यात आले. या कारवाईमुळे ग्रामस्थांमध्ये संताप आणि भीतीचे वातावरण होते. मोजणीला विरोध करण्यासाठी शेतकरी मोठ्या संख्येने रस्त्यावर उतरले. घोषणाबाजी व रास्ता रोको आंदोलनामुळे काहीकाळ तणावाचे वातावरण निर्माण झाले.  आम्हाला आता शासनाने गोळ्या घालाव्यात अन् मगच आमची जमीन बळकवावी, अशी संतप्त प्रतिक्रिया या शेतकऱ्यांमधून उमटली.

पुरुष-महिलांनाही गुरासारखे ओढले

एका शेतकरी कुटुंबाने मोजणीला विरोध करताना सोबत पेट्रोलची बाटली आणली. तुमचा मावेजा नको, आमची जमीनही घेऊ नका, असे ते ओरडून सांगत होते. मात्र प्रशासन हट्टाला पेटल्याने पेट्राेलची बाटलीच काढत मला मरू द्या, असे म्हणत या कुटुंबानेच टाहो फोडला.

महसूल व पोलिस प्रशासन कशामुळे दडपशाही करीत आहे. आमच्या गावातून बाहेर निघा, असे म्हणत ग्रामस्थांनी सहजपूर रस्ताच अडविला. त्यावेळी प्रशासन दमदाटी करीत असल्याने महिलांनी एकच आक्राेश केला. मात्र पुरुषांसह त्यांनाही गुराढोरांसारखे अमानुषपणे ओढून नेत ताब्यात घेतल्याचे शेतकऱ्यांनी सांगितले. काही काळानंतर  त्यांना सोडण्यात आले.