विजेचा धक्का लागून फूल व्यावसायिकाचा मृत्यू

गंगाखेड तालुक्यातील पिंपळदरी पोलीस ठाण्याच्या हद्दीतील राणीसावरगाव दूरक्षेत्राला (पोलीस चौकी) २३ फेब्रुवारी रोजी नांदेड परिक्षेत्राचे विशेष पोलीस महानिरीक्षक निसार तांबोळी भेट देऊन येथील नूतन इमारतीचा लोकार्पण करणार होते. २३ फेब्रुवारी रोजीच्या सकाळी ९:४० वाजताच्या सुमारास फूल व्यावसायिक संतोष विठ्ठलराव शिंदे हे राणीसावरगाव पोलीस चौकीच्या परिसरात नव्याने बांधण्यात आलेल्या इमारतीच्या छतावर जाऊन इमारतीची फुलाच्या माळेने सजावट करीत होते. तेव्हा तांदूळवाडीकडे विद्युत प्रवाह करणाऱ्या ११ केव्हीच्या मुख्य तारांना त्यांचा स्पर्श झाला. या घटनेत विजेचा धक्का लागून फूल व्यवसायिक संतोष विठ्ठलराव शिंदे (वय ३८) रा. राणीसावरगाव हे गंभीररीत्या भाजून जागीच कोसळले. याची माहिती समजताच त्यांचा भाऊ सतिश शिंदे, राहुल बनाटे, बालाजी जाधव, ओमकार डोणे, प्रदीप जाधव, गणेश कुलकर्णी, ज्ञानेश्वर शिंदे आदींनी त्यांना उपचारासाठी राणीसावरगाव येथील प्राथमिक आरोग्य केंद्रात दाखल केले. तेव्हा डॉक्टरांनी तपासून संतोष विठ्ठलराव शिंदे यांना मयत घोषित केले. सतीश विठ्ठलराव शिंदे यांनी दिलेल्या खबरीवरून याप्रकरणी पिंपळदरी पोलीस ठाण्यात अकस्मात मृत्यूची नोंद करण्यात आली. त्यांच्या पश्चात आई, वडील, एक भाऊ, पत्नी, एक मुलगी, दोन मुले असा परिवार आहे. या घटनेबद्दल राणीसावरगाव परिसरात हळहळ व्यक्त केली जात आहे.